ОХУ-д үлдсэн байсан цорын ганц хараат бус хэвлэл хаагдав
Оросын хамгийн нэр хүндтэй, тус улсын нутаг дэвсгэрт үйл ажиллагаа явуулж байсан сүүлчийн томоохон хараат бус хэвлэл болох “Новая газета” сонин 33 жилийн дараа хаалгаа бүрэн барьж, Москва хот дахь төв байраа хүлээлгэн өгчээ.
Тус редакцид өнгөрсөн сарын эцсээр Москвагийн төв дэх Потаповын гудамжинд байрлах байрнаасаа албадан нүүх мэдэгдэл ирсэн байна. Түүнчлэн ОХУ-ын төрийн аюулгүй байдлын албаны шахалтаар арилжааны банк, төлбөрийн системүүд уншигчдын хандив хүлээн авахыг зогсоосон нь тэдний санхүүгийн цорын ганц эх үүсвэрийг хаажээ. Үүний дараа нийтлэлийн зөвлөлөөс “Биднийг хөнөөлөө” гэсэн гарчигтай мэдэгдэл нийтэлж, төрийн эрх баригчид болон тусгай албадын шахалтаар үйл ажиллагаагаа албан ёсоор зогсоохоос өөр аргагүйд хүрснээ зарласан юм.
Сүүлчийн өдөр редакцийн баг хаалтын хурлаа хийж, серверийн төхөөрөмжүүдээ унтраан Москва дахь төв байраа орхисон байна.
Ерөнхий редактор Сергей Соколовоор ахлуулсан сэтгүүлчид ажлын байрны хананд байсан, мэргэжлийн үүргээ гүйцэтгэж яваад амиа алдсан зургаан хамтран зүтгэгчийнхээ хөргийг буулгажээ. Мөн байрны гадна хаяг дээр “Энд Новая газета оршин тогтнож байв” гэсэн бичиг хадсан бөгөөд тус сонины дэргэдэх Анна Политковскаягийн нэрэмжит музей мөн хаалгаа барьсан байна.
ОХУ 2022 онд Украин руу цөмрөн орсны дараа тус сонин хэвлэмэл дугаараа гаргахаа больж, хэвлэл мэдээллийн тусгай зөвшөөрлөө цуцлуулсан ч Москва дахь товчоо нь цахим хэлбэрээр мэдээллээ түгээсээр байв. Гэвч сүүлийн үед эрх баригчид тус байгууллагыг “гадаадын төлөөлөгч” хэмээн тодорхойлж, цаашлаад “хэт даврагч байгууллага” гэх ангилалд оруулахаар сүрдүүлсэн нь бүх ажилтныг эрүүгийн хариуцлагад татаж, хорих аюулд хүргэсэн байна. Кремлийн хэвлэлийн төлөөлөгч Дмитрий Песков уг үйл явдлыг хэвлэл мэдээллийн салбарын өрсөлдөөн дундах “ээлж солилцоо” хэмээн нэрлэжээ.
Сониныг хамтран үүсгэн байгуулагч, 2021 оны Нобелийн энх тайвны шагналт Дмитрий Муратов энэ тухайд “Энх тайвны төлөө дуугарч буй иргэд маань хүссэн мэдээллээ унших эрхгүй боллоо. Оросын үндсэн хуулиар баталгаажсан иргэний болон улс төрийн эрхийн заалтууд бодит амьдрал дээр хүчингүй болсны илрэл энэ юм” хэмээн мэдэгдэв. ЗХУ-ын удирдагч асан Михаил Горбачёвын дэмжлэгээр 1993 онд эхэлж байсан тус сонины 33 жилийн түүхэн архивыг гадны төслүүд цахимжуулан хамгаалж байгаа бөгөөд Сергей Соколовын онцолсноор цаг үе эргэх мөчид уншигчдадаа дахин эргэн ирэх итгэл найдварыг хамт олон нь тээж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.