Улаанбаатар хотын цэвэр бохир усны үйлчилгээний тарифыг шинэчлэн тогтоожээ

Нийслэл хотын хэмжээнд орон сууцны айл өрхүүдийн цэвэр, бохир усны үйлчилгээний тариф болон суурь хураамжийг шинэчлэн тогтоож, тоолууртай айл өрхүүд нэг шоо метр цэвэр усанд 2,000 төгрөг, бохир усанд 1,820 төгрөг төлөхөөр боллоо.

Хэрэглээний тоолуургүй айл өрхүүдийн хувьд төлбөрийг нэг хүнээр тооцож, сард цэвэр усны үйлчилгээнд 18,414 төгрөг, бохир усны үйлчилгээнд 16,430 төгрөг төлөх зохицуулалт батлагдсан байна. Мөн өрх бүрээс сар бүр авах цэвэр усны суурь хураамжийг 3,125 төгрөг, бохир усны суурь хураамжийг НӨАТ тооцоогүй дүнгээр 625 төгрөг байхаар шийдвэрлэжээ. Түүнчлэн халуун ус халаасны төлбөрийг зарцуулалтаар тооцвол нэг шоо метр тутамд 1,714 төгрөг, хэмжүүрээр нэг гигакалори нь 3,592 төгрөг байхаар тогтоосон байна.

Ус, дулааны үйлчилгээний үнэ тарифыг олон жилийн турш бодит өртгөөс нь доогуур барьж ирсэн нь УСУГ, ОСНААУГ зэрэг ус хангамж, ариутгах татуургын байгууллагуудыг алдагдалд хүргэж, хэвийн найдвартай ажиллагааг хангахад хүндрэл учруулжээ. Үүнээс гадна нийслэлийн инженерийн шугам сүлжээний 60–70 хувь нь насжилт өндөртэй, ашиглалтын шаардлага хангахгүй болсон нь шугамын алдагдал, аваар гэмтэл гарах гол шалтгаан болж байна. Орон сууцны ашиглалтын байгууллагууд элэгдлийн санд засварын төсөв хуримтлуулж чадахгүйн улмаас цалин, урсгал зардалд зарцуулж ирсэн нөхцөл байдал үүссэн байжээ.

Түүнчлэн ОСНААУГ-ын хэрэглэгчдийн тоо 110 мянгаас 166 мянга болж 50 орчим хувиар өссөн нь санхүүгийн болон хүний нөөц, засвар үйлчилгээний зардлын дарамтыг улам нэмэгдүүлсэн байна. Иймээс Хот, суурины ус хангамж, ариутгах татуургын ашиглалт, үйлчилгээг зохицуулах хорооноос тусгай зөвшөөрөл эзэмшигч байгууллагуудад үйлдвэрлэл, үйлчилгээний зардалд хяналт тавьж, үргүй зардлыг танахын сацуу усны алдагдлыг тууштай бууруулах үүрэг даалгавар өгөөд байна.