АНУ-ын Тагнуулын төв газрын удирдах албан тушаалтан 195 сая долларын залилангийн хэргээ хүлээв
АНУ-ын Тагнуулын төв газрын удирдах албан тушаалтан асан Дэвид Ж. Раш Засгийн газраасаа ойролцоогоор 195 сая ам.доллар залилсан хэргээ Виржиниа муж улсын Александриа хотын холбооны шүүхэд бүрэн хүлээлээ.
Тагнуулын төв газрын Шинжлэх ухаан, технологийн газарт удирдах түвшний алба хашиж байсан 49 настай Дэвид Ж. Раш өндөр зэрэглэлийн нууцын эрх мэдлээ ашиглан засгийн газрын нууц ажиллагаануудыг хуурамчаар зохиосон байна. Тэрбээр төрийн санхүүжилтээс 145 сая орчим ам.долларыг халхавч компаниудаар дамжуулан Флорида муж улсын өмнөд хэсэгт тансаг зэрэглэлийн дөрвөн харш худалдан авахад зориулжээ. Үүгээр зогсохгүй албаны зардал нэрийдлээр олон арван сая ам.долларын үнэ бүхий алтан гулдмай, гадаад валют гаргуулан авч, хувийн хэрэгцээндээ 1.8 сая гаруй ам.долларын үнэтэй тусгай нислэг үйлдсэн нь баримтаар нотлогдсон юм.
Холбооны мөрдөх товчооны ажилтнууд 2026 оны тавдугаар сард сэжигтний Виржиниа дахь гэрт нэгжлэг хийж, 40 гаруй сая доллароор үнэлэгдэх 303 ширхэг алтан гулдмай, хоёр сая орчим ам.долларын бэлэн мөнгө хураан авчээ.
Үүнээс гадна тансаг зэрэглэлийн 35 бугуйн цаг, хоёр ширхэг BMW загварын автомашин зэрэг хөрөнгийг нь битүүмжилсэн бөгөөд хэрэг хүлээх хэлцлийн дагуу тэрбээр хууль бусаар олсон 194 саяас доошгүй ам.долларын хөрөнгөө улсын орлого болгохоор зөвшөөрсөн байна.
Шүүх хурлын үеэр түүний үйлдсэн үндэсний аюулгүй байдалтай холбоотой өөр нэг ноцтой зөрчил ил болсон нь АНУ-ын тусгай албаны нууц эх сурвалжийн талаарх мэдээллийг гадаад улсын албан тушаалтанд задруулсан явдал байв. Түүнчлэн Дэвид Ж. Раш сүүлийн 20 орчим жилийн турш боловсролын зэрэг болон АНУ-ын Тэнгисийн цэргийн нисгэгч байсан гэх намтраа хуурамчаар үйлдэж, цэргийн чөлөөний тэтгэмж нэрээр 77 мянган ам.доллар завшсан байжээ.
Тус хэрэг илэрсэнтэй холбогдуулан Тагнуулын төв газрын хэд хэдэн албан тушаалтныг чөлөөлж, дотоод шалгалтын ажиллагааг эхлүүлээд байна. Холбооны шүүгч Майкл Начманоффын өмнө гэм буруугаа хүлээсэн түүнд 20 хүртэлх жилийн хорих ял оноох хуулийн заалттай бөгөөд ялын эцсийн шийдвэрийг 2027 оны нэгдүгээр сарын 28-ны өдөр танилцуулахаар товложээ.
Эх сурвалж:
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.