Францад дэлхийн хамгийн үнэтэй бөгөөд хүнд ховор ном хулгайлагджээ
Францын Иссуар хотод байрлах Орчин үеийн урлагийн төвөөс дэлхийн хамгийн хүнд бөгөөд хамгийн өндөр үнэтэйд тооцогддог "Апокалипсис" хэмээх монументаль ном хулгайлагдсан онц ноцтой хэрэг гарчээ.
Хэрэг 2026 оны аравдугаар сарын 4-нөөс 5-нд шилжих шөнө гарсан бөгөөд гэмт этгээдүүд нийт 210 килограмм жинтэй уг бүтээлийг хэрхэн авч гарсныг цагдаагийн байгууллага шалгаж байна. Энэхүү хосгүй бүтээлийг Францын арт-хэвлэн нийтлэгч, галерейн эзэн Жозеф Форе 1958-1961 оны хооронд тусгайлан захиалж урлуулсан бөгөөд Иоанны илчлэлтийн сэдэвтэй асар том илгэн хуудсууд дээр бүтээгджээ.
Уг номын чимэглэл, зургийг бүтээхэд XX зууны аугаа уран бүтээлчид болох Сальвадор Дали, Жан Кокто, Бернар Бюффе, Жан Жионо, Осип Цадкин нар гар бие оролцсон түүхтэй. Номын хүрэл хавтсыг алдарт зураач Сальвадор Дали биечлэн цутгаж, алт, үнэт чулуу болон далайн хясаа шигтгэж чимэглэсэн байна.
Зөвхөн Далигийн урласан хүрэл хавтас нь дангаараа 150 орчим килограмм жин татдаг тул хулгайч нар урьдаас нарийн төлөвлөсөн, техник ашигласан байх магадлалтай гэж үзэж буй юм.
Анх хэвлэгдэн гарах үедээ уг ном 100 сая хуучин франк буюу ойролцоогоор 2 сая франкаар үнэлэгдэж, дэлхийн хамгийн үнэтэй номоор албан ёсоор бүртгэгдэж байжээ. Орчин цагийн урлаг судлаачид болон зах зээлийн шинжээчид түүний бодит үнэлгээг хэдэн сая еврогоор тооцож байгаа бөгөөд соёлын үнэт зүйлийн хувьд нөхөж баршгүй өвд тооцогддог байна. Тус үнэт өвийг 2003 онд урлагийн бүтээл сэргээн засварлагч, Иссуар дахь үзэсгэлэнгийн төвийн үүсгэн байгуулагч Кристиан Карутзос дуудлага худалдаагаар хэсэглэгдэн зарагдахаас нь өмнө өөрийн хөрөнгөөр худалдан авч, хадгалж байжээ.
Үнэт өвөө алдсан урлагийн төвийн тэргүүн Кристиан Карутзос соёлын үнэт дурсгалаа алдсандаа гүнээ харамсаж буйгаа илэрхийлсэн бол хотын дарга Бертран Барро энэхүү явдлыг улсын урлагийн өв сангийн хувьд хүнд гарз болсныг онцоллоо. Одоогоор Клермон-Ферран хотын прокурорын газар болон тус бүс нутгийн мөрдөх алба тусгай ажиллагаа явуулж, гэмт этгээдүүдийг баривчлахаар ажиллаж байна.
Эх сурвалж:
• news.ru
• life.ru
• dzen.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.