Хөгжлийн бэрхшээлтэй иргэдийг хүчирхийлсэн асрамжийн газрын даргад 15 жилийн ял оноов
Өмнөд Солонгосын Инчон хотын Гангхва дүүрэгт байрлах, хөгжлийн бэрхшээлтэй иргэдийн "Сэкдонгвон" асрамжийн газрын дарга асан Кимд холбогдох бэлгийн болон бие махбодын хүчирхийллийн хэргийг Сөүлийн төв дүүргийн шүүх хянан хэлэлцэж, түүнд 15 жилийн хорих ял оноолоо.
Улсын төсвөөс санхүүждэг тус төвийн удирдлага асан Ким нь оюуны болон хөгжлийн бэрхшээлтэй асруулагчдыг олон жилийн турш дарамталж, бэлгийн хүчирхийлэл үйлддэг байсан нь тогтоогдсон байна. Шүүхээс түүнд хорих ялаас гадна хөгжлийн бэрхшээлтэй иргэд болон хүүхэд, залуучуудын байгууллагад ажиллах эрхийг арван жилээр хасаж, суллагдсаных нь дараа гурван жилийн хяналт тогтоох шийдвэр гаргажээ.
Шүүх хуралдааны явцад Ким нь 2012 оноос 2025 оны хооронд тус төвийн хоёр эмэгтэй асруулагчийг удаа дараа хүчирхийлсэн, өөр нэг эмэгтэйд бэлгийн хүчирхийллээс гадна бие махбодын дарамт шахалт үзүүлсэн хэрэгт буруутайг тогтоосон байна. Тэрээр асруулагчдыг өөрийгөө "аав" гэж дуудахыг албаддаг байсан бөгөөд энэхүү зохиомол гэр бүлийн харилцаа нь хохирогчдыг дарамтлах, тэдний эмзэг байдлыг ашиглан үйлдсэн хэргээ нуун дарагдуулах хэрэгсэл болж байсныг прокурор болон өмгөөлөгчид онцлов. Энэхүү хүч тэнцвэргүй байдал нь хохирогчдод тусламж хүсэх, хүчирхийллийн талаар мэдээлэх боломжийг хааж байжээ.
Олон жил нуугдмал байсан уг хэрэг 2025 оны хоёрдугаар сард ил болсон байна. Тус төвд 2016 оноос хойш амьдарсан, 40 гаруй насны Со Ми-хён (зохиомол нэр) гэх эмэгтэй рүү Ким бэлгийн халдлага үйлдэхээр дайрах үед хохирогч эсэргүүцэл үзүүлжээ. Үүнд уурссан Ким хохирогчийн толгой руу шилэн аяга шидэж гэмтээсэн байна.
Асрамжийн газрын ажилтнууд хохирогчийг эмнэлэгт хүргэж, шархыг нь оёулсны дараа л ар гэрийнхэнд нь мэдэгдсэн бөгөөд хохирогчийн ээж хяналтын камерын бичлэгийг үзэхийг шаардахад "зөвшөөрөлгүй" гэх шалтгаанаар татгалзжээ. Үүний дараа ээж нь охиноо тус төвөөс авч явсан бөгөөд хохирогч дахин тийшээ буцахгүй гэдэгтээ итгэлтэй болсныхоо дараа өөрт тохиолдсон хүчирхийллийн талаар ярьж, цагдаагийн байгууллагад гомдол гаргасан байна.
Гангхва дүүргийн захиалгаар Вүүсүк их сургуулийн профессороор ахлуулсан багийн хийсэн хараат бус шалгалтаар тус асрамжийн газарт хамгийн багадаа 10, магадгүй 19 хүртэлх асруулагч Кимийн бэлгийн хүчирхийлэлд өртсөн байж болзошгүй баримтууд илэрчээ.
Шүүх хурлын дараа хөгжлийн бэрхшээлтэй иргэдийн эрхийг хамгаалах байгууллагууд болон шинжээчид мөрдөн байцаалтын явцыг шүүмжилжээ. Учир нь мөрдөгчид зөвхөн өөрт тохиолдсон зүйлийг бүтэн өгүүлбэрээр илэрхийлж чадах хохирогчдын хэргийг л шүүхэд шилжүүлсэн бөгөөд ярианы болон танин мэдэхүйн хүнд хэлбэрийн бэрхшээлтэй, өөрийгөө илэрхийлэх чадваргүй хохирогчдыг хэргээс гадуур үлдээсэнд идэвхтэнүүд дургүйцлээ илэрхийлжээ.
Уг хэрэгтэй холбогдуулан Гангхва дүүргийн захиргаанаас "Сэкдонгвон" асрамжийн газрыг хаах шийдвэр гаргаж, үйл ажиллагаа явуулах зөвшөөрлийг цуцалсан байна. Одоогоор тус төвд үлдсэн 33 асруулагчийг бие даан амьдрах болон өөр асрамжийн газарт шилжүүлэх төлөвлөгөөг боловсруулж байгаа бөгөөд үүний дараа үйл ажиллагааг нь бүрмөсөн зогсоох аж. Нөгөө талаас, тус асрамжийн газрыг ажиллуулдаг сангийн зүгээс орон нутгийн захиргааны шийдвэрийг эсэргүүцэж, захиргааны хэргийн шүүхэд нэхэмжлэл гаргаад байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.