Окинавад Японы иргэнийг хөнөөсөн хэрэгт АНУ-ын тэнгисийн явган цэргийг сэжиглэн баривчилжээ
Японы Окинава арлын Наха хотын нэгэн зочид буудалд тус улсын иргэн, 39 настай Анна Ягигийн амийг хөнөөж, хувийн эд зүйлсийг нь дээрэмдсэн хэрэгт АНУ-ын Тэнгисийн явган цэргийн алба хаагчийг сэжиглэн баривчилсан байна.
Энэхүү хэрэг явдалтай холбогдуулан Япон улсын Засгийн газар АНУ-ын талд дипломат шугамаар эрс эсэргүүцэл илэрхийлж, хэрэг мөрдөх ажиллагаанд бүрэн хамтран ажиллахыг шаардлаа. Сэжигтэн нь Окинава дахь Футенма агаарын баазад алба хаадаг, 20 настай түрүүч Девин Жейкоб Баллард бөгөөд тэрбээр өөрт тулгасан яллах дүгнэлтийг эрс үгүйсгэж байгаа ажээ.
Хэрэг явдал 2026 оны аравдугаар сарын 3-ны бямба гаргийн үүрээр гарсан бөгөөд хяналтын камерын бичлэгт хохирогчтой хамт зочид буудлын өрөө рүү орж, улмаар түүний цүнх, түрийвчийг авч гарч байгаа нь бичигдэн үлджээ. Цагдаагийн байгууллага бичлэгт үлдсэн дүрсний дагуу эрэн сурвалжлах ажиллагаа явуулж, сэжигтнийг саатуулан байцааж эхэлсэн байна. Мөн зочид буудлын ойролцоогоос хохирогчийн хаягдсан хувийн эд зүйлсийг олж тогтоосон нь хэргийн чухал нотлох баримт болжээ. Хэдийгээр нотлох баримтууд байгаа ч сэжигтэн Девин Жейкоб Баллард өөрийгөө буруугүй хэмээн мэдүүлсээр байна.
Уг хэрэг гарсантай холбогдуулан Япон улсын Ерөнхий сайд Санаэ Такаичи албан ёсны мэдэгдэл гаргаж, болсон явдлыг "онц хэрцгий, жигшүүрт хэрэг" хэмээн тодорхойлоод, туйлын харамсал илэрхийлэв.
Тэрбээр АНУ-ын талаас хэрэг мөрдөх ажиллагаанд дээд зэргээр хамтран ажиллах, цэргийн алба хаагчдын сахилга батыг чангатгах, мөн ийм төрлийн гэмт хэрэг дахин гаргахгүй байх цогц арга хэмжээ авахыг хатуу шаардсан байна. Үүний зэрэгцээ Японы Гадаад хэргийн сайд Тошимицу Мотеги АНУ-аас Япон улсад суугаа Элчин сайд Жорж Глассыг Гадаад хэргийн яаманд дуудаж, албан ёсны эсэргүүцлийн нот бичгийг гардуулан өгчээ.
Японы Батлан хамгаалахын сайд Шинжиро Коизүми мөн адил гүнээ бухимдаж байгаагаа илэрхийлээд, ийм төрлийн гэмт хэргийг хэрхэвч хүлээн зөвшөөрөх боломжгүй гэдгийг онцлон тэмдэглэв. Окинава мужийн шинээр сонгогдсон Засаг дарга Гэнта Кожа уг хэргийг "уучлашгүй үйлдэл" хэмээн буруушааж, АНУ-ын цэргийн баазууд төвлөрсөн бүс нутагт амьдарч буй нутгийн иргэдэд энэхүү хэрэг явдал асар их цочрол, айдас дагуулж байгааг мэдэгдсэн байна. Окинавагийн оршин суугчид цэргийн баазуудын хажууд амьдарсаар ирсэн бөгөөд энэ удаагийн хэрэг олон нийтийн дургүйцлийг дахин төрүүллээ.
АНУ-ын Элчин сайд Жорж Гласс амь үрэгдсэн эмэгтэйн гэр бүлд гүн эмгэнэл илэрхийлж, хэргийн мөрдөн байцаалтад орон нутгийн цагдаагийн байгууллагатай "бүрэн хамтран ажиллахаа" амласан байна.
Цаашид энэхүү хэргийн шийдвэрлэлт болон АНУ-ын талаас авах арга хэмжээ нь хоёр улсын батлан хамгаалах салбарын хамтын ажиллагаа, Окинава дахь цэргийн баазын аюулгүй байдлын асуудалд томоохон нөлөө үзүүлэхээр байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.