Өмнөд Африкийн уушийн газарт зэвсэгт халдлага гарч 17 хүн амиа алджээ
Өмнөд Африкийн Бүгд Найрамдах Улсын Гаутенг мужид байрлах нэгэн уушийн газарт зэвсэглэсэн бүлэг этгээдүүд гал нээсний улмаас 17 хүн амь үрэгдэж, 15 хүн шархадсан ноцтой хэрэг гарчээ.
Цагдаагийн байгууллагаас мэдээлснээр халдлага бямба гаргийн үдэш Йоханнесбург хотын баруун өмнөд хэсэгт орших Ведела хотхоны уушийн газарт болсон бөгөөд одоогоор гэмт этгээдүүдийг баривчлахаар эрэн сурвалжлах өргөн хүрээний ажиллагааг эхлүүлээд байна.
Халдлага тус бүсийн 3 дугаар өргөтгөлд байрлах уушийн газарт орон нутгийн цагаар 21:30 цагийн орчимд гарсан байна. Ослын газарт түргэн тусламжийн албаныхан ирэхэд нийт 17 хүн шархаа даалгүй газар дээрээ нас барсныг тогтоожээ. Амиа алдагсдын 13 нь эрэгтэй, дөрөв нь эмэгтэй байсан бөгөөд галт зэвсгийн шарх авсан өөр 15 иргэнийг ойролцоох эмнэлгийн байгууллагуудад шуурхай хүргэн эмчилж эхэлсэн байна.
Урьдчилсан мэдээллээр уг халдлагыг нийт найман этгээд хамтран үйлдсэн бөгөөд тэд АК-47 автомат буу болон гар буугаар зэвсэглэсэн байжээ. Гэрчүүдийн өгүүлж буйгаар халдагчид эхлээд уг газрын гадна талбайд байсан иргэд рүү гал нээж, дараа нь дотогш нэвтрэн дайралтаа үргэлжлүүлсэн байна.
Түүнчлэн гэмт этгээдүүд зугтахаасаа өмнө хохирогчдын гар утсыг дээрэмдэн авч, тодорхойгүй хоёр автомашинд суун хэргийн газраас зугтсан болохыг хууль сахиулагчид тогтоожээ.
Өмнөд Африкийн цагдаагийн алба (SAPS) хэргийн газарт нарийвчилсан шалгалт явуулж байгаа ч одоогоор хэн нэгнийг сэжигтнээр баривчлаагүй байна. Цуст халдлага үйлдсэн шалтгаан, сэдэл одоогоор тодорхойгүй байгаа бөгөөд оргон зайлсан зэвсэгт бүлгийг олж илрүүлэхээр бүх чиглэлд мөрдлөг, хайлтыг эрчимтэй үргэлжлүүлж байгаа аж.
Эх сурвалж:
• ksl.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.