Орос улс Украин, Молдовын хилийн шалган нэвтрүүлэх боомтыг дрондов
ОХУ-ын зүгээс Украины өмнөд хэсгийн Одесс мужид орших Украин, Молдовын хилийн Старокозаче олон улсын шалган нэвтрүүлэх боомтыг нисгэгчгүй төхөөрөмжөөр цохиж, энгийн хоёр иргэний аминд хүрчээ.
Молдовын хилээс ердөө нэг километрийн зайд байрлах тус боомт руу чиглэсэн дайралтын улмаас гурван хүн бэртэж гэмтсэний дунд мөргөлчдийг тээвэрлээд буцаж явсан Молдовын автобусны жолооч багтсан байна.
Халдлагын дараа аврах албаныхан боомт дээр галд өртөх эрсдэлтэй байсан автобуснаас 16 хүнийг шуурхай нүүлгэн шилжүүлжээ. Дроны цохилтын улмаас шалган нэвтрүүлэх дэд бүтэц эвдэрч, түймэр гарсны улмаас зорчигч болон тээврийн хэрэгслийн хил дамнасан хөдөлгөөнийг түр зогсоосон бөгөөд хожим нь хэвийн үйл ажиллагааг сэргээсэн байна.
Украины Хилийн албаны хэвлэлийн төлөөлөгчийн мэдээлснээр Оросын зэвсэгт хүчин худалдааны логистик болон хуурай замын экспортын гол чиглэлүүдийг зориуд онилж байгаа аж.
Албаны эх сурвалжуудын онцолсноор сүүлийн үед хил дагуух дэд бүтцэд чиглэсэн агаарын цохилтууд эрчимжиж байна. Оросын арми сүүлийн үед хилийн нийт таван гарц руу цохилт өгсний дөрөв нь Молдовын хил дээр, нэг нь НАТО-гийн гишүүн Румын улстай залгаа хилийн боомтод бүртгэгджээ. Энэ нь хөрш зэргэлдээ орнуудын хилийн аюулгүй байдалд шууд эрсдэл үүсгэж эхэлснийг харуулж байна.
Хилийн боомт руу чиглэсэн энэхүү халдлага нь Украины нутаг дэвсгэрийг бүхэлд нь хамарсан өргөн цар хүрээтэй довтолгооны нэг хэсэг байв. Нийслэл Киев хотод лхагва гаргийн шөнө тийрэлтэт хөдөлгүүртэй дроноор цохилт өгсний улмаас нэг хүн нас барж, 14-17 хүн шархадсан бол Сумы хотод худалдааны төв өртөж хоёр хүн амиа алдан, 20 хүн гэмтсэн байна. Мөн Кривой Рог, Хмельницкий хотууд дроны цохилтод өртсөн бөгөөд хариуд нь Украины тал Оросын Новороссийск боомтын газрын тосны терминал руу довтолж, дөрвөн хүний аминд хүрсэн харилцан цохилтууд өрнөжээ.
Молдовын Ерөнхийлөгч Майя Санду өөрийн улсын хилийн ойролцоо гарсан уг цохилтыг хатуу зэмлэн буруушааж, Оросын дрон агаарын зайд нь цөмөрсний улмаас нислэгүүдийг түр зогсоож байснаа мэдэгдэв. Тэрбээр Украины агаарын довтолгооноос хамгаалах чадавхыг яаралтай нэмэгдүүлэхийг олон улсад уриалсан юм.
Харин Украины Ерөнхийлөгч Владимир Зеленский энгийн тээврийн замууд руу халдахыг хэзээ ч хүлцэж болохгүй гээд, өвөл болохоос урьтан хариу арга хэмжээ авахгүй бол хямрал гүнзгийрнэ гэдгийг анхааруулан, хилийн коридорууд руу хийж буй дайралтуудад дэлхийн хамтын нөхөрлөл хангалтгүй хариу үзүүлж байгаад шүүмжлэлтэй хандлаа.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.