Ерөнхийлөгч Трамп, Путин нар Украины дайныг зогсоох асуудлаар ярилцжээ
АНУ-ын Ерөнхийлөгч Дональд Трамп, ОХУ-ын Ерөнхийлөгч Владимир Путин нар 2026 оны есдүгээр сарын 8-нд утсаар нэг цаг орчим ярилцаж, Украины дайныг зогсоох дипломат хүчин чармайлт болон АНУ-ын тусгай элч нарын Москва, Киевт хийсэн айлчлалын үр дүнг хэлэлцжээ.
Трамп Украины мөргөлдөөнийг аль болох хурдан дуусгах шаардлагатайг онцолж, ингэснээр АНУ, ОХУ-ын харилцаа, худалдаа, эдийн засгийн хамтын ажиллагааг сэргээх боломж нээгдэнэ гэж үзжээ.
Путин АНУ-ын зүгээс мөргөлдөөнийг зогсооход ямар алхам хийх боломжтой талаар байр сууриа илэрхийлж, фронтын нөхцөл байдлын талаар Трампад мэдээлсэн байна. Мөн ОХУ Европын орнуудын эсрэг түрэмгий төлөвлөгөөгүй гэж мэдэгджээ.
Энэхүү ярианаас өмнө АНУ-ын тусгай элч нар Москва, Киевт айлчилсан. Тэд есдүгээр сарын 5-нд Москвад Владимир Путинтэй уулзаж, дараагийн өдөр нь Киевт Украины Ерөнхийлөгч Володимир Зеленскийтэй хэлэлцээ хийсэн байна. Зеленский АНУ-ын элч нарын танилцуулсан шинэ саналуудыг “сайн, ач холбогдолтой санаанууд” гэж үнэлсэн боловч хэлэлцээ нь дайныг зогсоох талаар тодорхой ахиц гаргаагүй байна.
Украины тал эдгээр саналыг цаашид АНУ-тай хамтран боловсруулахад бэлэн байгаагаа илэрхийлжээ. Мөн Украин, АНУ, Европын төлөөлөгчид цаашдын гурван талт уулзалтыг бэлтгэхээр ажиллахаар төлөвлөж байна. Гэвч дипломат ажиллагаатай зэрэгцэн байлдааны ажиллагаа үргэлжилжээ. АНУ-ын элч нарын айлчлалын үеэр Москва, Киев рүү хийх агаарын цохилт түр намжсан боловч айлчлал дууссаны дараа Оросын тал Киев хотод пуужин, дроны цохилтоо сэргээж, таван хүн амиа алдаж, 30 гаруй хүн шархаджээ.
Трамп, Путин нар цаашид холбоотой байж, шаардлагатай үед дахин утсаар ярилцахаар тохиролцсон бөгөөд дайны олзлогсдыг солилцох ажиллагааг үргэлжлүүлэх шаардлагатай гэдэг дээр санал нэгдсэн байна. АНУ-ын дипломат хүчин чармайлт дахин идэвхэжсэн ч Украины дайныг зогсоох тохиролцоонд хараахан хүрээгүй байна. Орос, Украины байр суурь, ялангуяа нутаг дэвсгэрийн асуудлаар зөрүүтэй хэвээр байгаа бөгөөд Reuters агентлагийн мэдээлснээр фронтын нөхцөл байдал ч дипломат ахицад саад болж байгаа аж.
Эх сурвалж:
• pbs.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.