Мексикийн гэмт хэргийн бүлэглэлүүд дроныг өргөнөөр ашиглаж эхэлжээ
Мексикийн хар тамхины картелиуд АНУ-ын хилийн дагуу хууль бус ажиллагаа болон тандалт хийхдээ арилжааны нисгэгчгүй төхөөрөмж буюу дроныг урьд өмнө байгаагүй өргөн цар хүрээтэй ашиглаж эхэлснийг CNN агентлагийн эрэн сурвалжлах нэвтрүүлгээр ил болголоо.
Хил дамнасан гэмт бүлэглэлүүд агаарын камер бүхий дронуудыг ашиглан хууль сахиулагчдын эргүүлийг мөрдөж, шалгалтаас бултах арга замаа төвөггүй олж байгаа аж.
Техас мужийн Нийгмийн аюулгүй байдлын газрын мэдээллээс харахад 2021 оноос хойш Рио-Гранде мөрний хилийн бүсэд хэдэн мянган дроны хөдөлгөөн бүртгэгджээ. Тэр дундаа Техасын Ларедо хотын чиглэлд сүүлийн гурван жилийн хугацаанд Мексикийн талаас илэрсэн нисгэгчгүй төхөөрөмжийн тоо 600 гаруй хувиар огцом өссөн үзүүлэлттэй гарсан байна. Хууль сахиулах албаныхны мэдээлснээр картелиудын дрон нисгэх давтамж өмнө нь долоо хоногт ганц удаа ажиглагддаг байсан бол одоо өдөрт хэд хэдэн удаагийн нислэг болж нэмэгджээ.
Шалгаж баталгаажуулсан бичлэгүүдээс үзвэл гэмт бүлэглэлүүд хууль бусаар хил нэвтрүүлэгчдийг дрон ашиглан маш нарийн зохион байгуулалттай удирдаж байна. Ларедо хотын орчимд Рио-Гранде мөрнийг гатлан гүйж буй хүмүүсийг агаараас бүрэн хянаж, тэднийг тосож авах автомашиныг шороон зам дээр яг ирэх үетэй нь тааруулан авчирч, шууд хөдлөн, зугтаалгаж байсан тохиолдол баримттайгаар бүртгэгджээ.
Түүнчлэн Мексикийн нутаг дэвсгэр дотор картелиуд дроныг зөвхөн тандалтад төдийгүй үхлийн аюултай зэвсэг болгон өөрчилж эхэлсэн байна. Тэд арилжааны дронд гар хийцийн тэсрэх бөмбөг бэхлэн, өрсөлдөгч бүлэглэлүүд, орон нутгийн цагдаа болон энгийн иргэд рүү агаараас дайралт хийж байгаа юм. Гэхдээ тэд АНУ-ын цэрэг болон холбооны түвшний шууд хариу арга хэмжээг өдөөхгүйн тулд АНУ-ын нутаг дэвсгэр рүү зэвсэглэсэн дрон нисгэхээс болгоомжлон зайлсхийж байна.
АНУ-ын Хил, гаалийн хамгаалалтын алба картелиуд хууль бус наймаа болон хууль сахиулагчдыг тандахдаа дрон ашиглах нь улам өсөж байгааг баталсан юм. АНУ-ын Дотоодын аюулгүй байдлын яам дроны эсрэг тусгай хамгаалалтын эрхийг хилийн албанд олгоод байгаа ч одоогоор хил дамнасан нисгэгчгүй төхөөрөмжүүдийн түрэмгийлэл буурах шинж ажиглагдахгүй байгааг албаныхан анхааруулж байна.
Эх сурвалж:
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.