АНУ-д шатахууны үнэ өссөн нь хэрэглэгчдэд дарамт учруулсан хэвээр байна
Америкийн Нэгдсэн Улсад Хөдөлмөрчдийн баярын амралтын өдрүүдээр ердийн бензиний дундаж үнэ нэг галлон нь 4.15 ам.долларт хүрч, түүхэн дээд хэмжээг шинэчиллээ.
Энэ нь 2012 онд бүртгэгдсэн 3.82 ам.долларын дээд амжилтыг давсан үзүүлэлт бөгөөд эрчим хүчний шинжээчид намар ч шатахууны өндөр үнийн дарамт үргэлжилнэ хэмээн сэрэмжлүүлж байна.
Дизель түлшний үнэ нэг галлон нь 5.78-аас 5.90 ам.доллар хүртэл өссөн нь бүх цаг үеийн дээд түвшинд хүрч, тээвэр логистик болон нийлүүлэлтийн сүлжээний зардалд хүчтэй нөлөөлж эхлэв. Брауны их сургуулийн Ватсоны нэрэмжит Олон улс, олон нийтийн харилцааны сургуулийн тооцоолсноор хоёрдугаар сарын сүүлчээс хойш шатахууны үнийн өсөлт АНУ-ын хэрэглэгчдэд нийт 100.9 тэрбум ам.долларын нэмэлт зардал учруулжээ. Энэ нь нэг өрхөд дунджаар 770 ам.долларын нэмэлт зардал ногдож буй хэрэг бөгөөд үүний 422 ам.доллар нь дан ганц бензиний үнийн өсөлтөөс үүдэлтэй байна.
Шатахууны зах зээл дэх үнийн огцом хөөрөгдлийн гол шалтгаан нь Иран болон АНУ-ын хоорондох зэвсэгт мөргөлдөөн болж байна.
Ормузын хоолойд үүссэн хаалт хориг болон цэргийн мөргөлдөөний улмаас газрын тосны тээвэрлэлтийн гол замууд хаагдаж, түүхий тосны ханш нэг торх нь 90-100 ам.долларын бүсэд шилжжээ. Түүнчлэн Украины нисгэгчгүй онгоцууд Оросын газрын тос боловсруулах үйлдвэрүүдэд цохилт өгч байгаа нь дэлхийн зах зээл дэх нийлүүлэлтийг хумихад нөлөөлсөн бөгөөд газрын тос боловсруулах үйлдвэрүүдийн хүчин чадал туйлдаа хүрч, АНУ-ын нөөц хумигдсаар байна.
Зуны аяллын улирал дууссаны дараа үнэ буурдаг уламжлалт зүй тогтол алдагдаж, Gulf Oil компанийн шинжээч энэ намрыг түүхэн дэх хамгийн өндөр өртөгтэй улирал болж болзошгүйг онцоллоо. Дизель түлшний үнэ 6 ам.долларт дөхсөн нь тээвэрлэлт, хөдөө аж ахуй, хүнсний бүтээгдэхүүний өртгийг нэмэгдүүлж буй тул Хэрэглэгчийн итгэлийн индекс наймдугаар сард 89.4 нэгж болж сүүлийн долоон сарын хамгийн доод цэгт хүрсэн байна. Конгрессын завсрын сонгууль болоход 70 хүрэхгүй хоног үлдээд буй энэ үед шатахууны өндөр өртөг Цагаан ордон болон Бүгд найрамдах намын улс төрийн гол эмзэг сэдэв болоод байна.
Ерөнхийлөгч Дональд Трамп газрын тос боловсруулагчидтай уулзалт хийж, Венесуэлээс газрын тос нийлүүлэх гэрээ байгуулснаа зарлан цэргийн мөргөлдөөн шийдэгдсэний дараа үнэ хоёр ам.доллароос доош унана гэж мэдэгдлээ.
Эрчим хүчний сайд Крис Райт зах зээлийн савалгааг хүлээн зөвшөөрөхийн сацуу фьючерс үнэ буурч байгаад найдаж буйгаа илэрхийлсэн бол дэд ерөнхийлөгч Жей Ди Вэнс бүс нутгийн халдлагыг түр зуурын хурцадмал байдал гэж тодорхойлжээ. Зах зээлийн шинжээчид эрчим хүчний инфляцыг сөргүүлэхийн тулд Холбооны нөөцийн систем бодлогын хүүгээ өсгөх магадлалыг 50 орчим хувьтай гэж үзэж байна.
Эх сурвалж:
• kvia.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.