Он гарсаар баавгай суурьшлын бүсэд орж ирсэн 10 гаруй тохиолдол бүртгэгджээ
БОУАӨЯ-ны Байгалийн нөөцийн бодлого, зохистой ашиглалтын газрын Биологийн олон янз байдлын асуудал хариуцсан ахлах мэргэжилтэн Б.Хандармаа зэрлэг амьтан, тэр дундаа баавгай суурьшлын бүсэд нэвтрэх тохиолдол нэмэгдэж буй шалтгаан болон үүнээс урьдчилан сэргийлэх арга хэмжээний талаар мэдээлэл өглөө.
БОУАӨЯ-ны Байгалийн нөөцийн бодлого, зохистой ашиглалтын газрын Биологийн олон янз байдлын асуудал хариуцсан ахлах мэргэжилтэн Б.Хандармаа:
–2026 он гарсаар өнөөдрийн байдлаар баавгай суурьшлын бүсэд орж ирсэн 10 орчим тохиолдол бүртгэгдээд байна. 2026 оны хаврын улиралд Сэлэнгэ аймагт баавгай орж ирсэн тохиолдол бүртгэгдсэн. Мөн энэ онд Дорнод, Хэнтий, Сэлэнгэ болон Хөвсгөл аймгийн хил дагуух сумдад баавгай суурьшлын бүсэд нэвтэрсэн тохиолдлууд бүртгэгдэж байна. Эдгээр тохиолдол бүрд тухайн аймгийн Байгаль орчны газар, Онцгой байдлын газар болон сумын Онцгой комисс хамтран ажиллаж, баавгайг аль болох стрессдүүлэхгүйгээр хөөж үргээх арга хэмжээг авч байна.
Бид баавгай суурьшлын бүсэд дөхөж ирсэн шалтгааныг тогтоох зорилгоор мэдээлэл цуглуулж байна. Үүнд үндэслэн цаашид хэрэгжүүлэх зөвлөмж, чиглэлүүдийг тодорхойлно. Асуудлыг зөвхөн нэг өнцгөөс харж шийдвэрлэх боломжгүй. Тухайн баавгай ямар шалтгаанаар суурьшлын бүсэд орж ирсэн, айл руу ойртсон бол тухайн айлд баавгайг татах зүйл байсан эсэх, тэр орчимд идэш тэжээл болох жимс, самрын ургац ямар байсан, хууль бус ан агнуур их байгаа эсэх, иргэд ууланд олноороо самар бэлтгэж, баавгайг үргээж дайжуулсан эсэх зэрэг олон хүчин зүйлийг харгалзан мэдээлэл цуглуулж байна.
Яамны цахим хуудас, вебсайт болон аймгуудын Байгаль орчны газрын пэйж хуудсаар дамжуулан баавгай болон бусад зэрлэг амьтантай хэрхэн харилцах, хэрхэн аюулаас урьдчилан сэргийлэх талаар дэлгэрэнгүй зөвлөмжүүдийг иргэдэд хүргэж байгаа.
Нөгөө талаас зэрлэг амьтанд шууд бурууг өгөх боломжгүй. Иргэд дан ганц би хамгаалагдах эрхтэй гэхээс илүү аюултай нөхцөл байдалд өртөхөөс урьдчилан сэргийлэх шаардлагатай. Түүнчлэн баавгайг суурьшлын бүсэд татахгүй байх практик зөвлөмжүүд бий. Аль болох баавгайн анхаарлыг татах, үнэртэх зүйлсийг битүү саванд хадгалах хэрэгтэй.
Тухайлбал, цагаан идээ болон шинээр мал нядалж, мах гаргасан тохиолдолд үнэрийг нь аль болох битүүмжилж хадгалах шаардлагатай. Мөн зөгийн аж ахуй эрхлэгчид аж ахуйгаа хамгаалах хэрэгтэй байна. Олон улсын туршлагаас харахад баавгай зөгийн аж ахуй руу ихээр дайрдаг. Тиймээс зөгийн үүр байршуулсан хэсгийг цахилгаан хашаа, цахилгаанжуулсан утсаар тойруулах зэрэг арга хэмжээг туршиж байна. Цаашид баавгай болон хүн хоорондын зөрчлийг бууруулах, зэрлэг амьтдыг хамгаалах чиглэлээр орон нутагт хамгааллын арга хэмжээнүүдийг туршин хэрэгжүүлэх төслийн санаачилга гарган ажиллаж байна гэв.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.