ОХУ-ын Су-35С сөнөөгч онгоцууд хоорондоо мөргөлджээ
ОХУ-ын Курск мужийн агаарын зайд 2026 оны есдүгээр сарын 7-ны даваа гаргийн орой Оросын Агаарын-сансрын хүчний орчин үеийн хоёр Су-35С сөнөөгч онгоц хоорондоо мөргөлдөж, сүйрсэн осол гарчээ.
Уг ослын улмаас нэг нисгэгч амь үрэгдэж, нөгөө нисгэгч нь шүхрээр бууж амжсан ч хүнд бэртэл авч, эмнэлэгт хүргэгдсэн байна. Одоогоор агаарын хөлгүүд мөргөлдсөн шалтгааныг тогтоохоор албаныхан ажиллаж байна.
Сөнөөгч онгоцууд нисэх буудлын ойролцоо бус, харин агаарт өндөр хурдтай нисэж явахдаа мөргөлдсөн бөгөөд хоёр техник хоёулаа бүрэн сүйрсэн байна. Су-35С нь нэг хүний суудалтай сөнөөгч онгоц тул хөлөг тус бүрд нэг нисгэгч байжээ.
ОХУ-ын Батлан хамгаалах яамнаас одоогоор уг ослын талаар албан ёсны тайлбар хийгээгүй байна.
Цэргийн зарим сувгууд, тухайлбал "Воевода Вещает" сувгийг хөтлөгч, Агаарын-сансрын хүчний офицер Алексей Земцов уг хэрэгт Украины талыг буруутгахыг оролдож, "тэд хариуцлага хүлээх болно" гэж бичсэн ч үүнийг батлах ямар нэгэн нотлох баримт, агаарын довтолгооноос хамгаалах пуужинд өртсөн гэх ул мөр олдоогүй байна. Украины зэвсэгт хүчний зүгээс ч уг осолд холбоотой гэх ямар нэгэн мэдэгдэл гаргаагүй байна.
Су-35С нь Оросын зэвсэглэлд байгаа хамгийн орчин үеийн, хүчирхэг 4++ үеийн олон үүрэгт сөнөөгч онгоц юм. Зөвлөлтийн үеийн Су-27 загварын шинэчилсэн загвар болох уг хөлөг нь "Ирбис" радарын системээр тоноглогдсон бөгөөд 300 км хүртэлх зайд байгаа байг устгах чадвартай Р-37М алсын тусгалтай пуужин тээвэрлэдэг. Оросын арми эдгээр сөнөөгчдийг бөмбөгдөгч онгоцуудыг хамгаалах, агаарын давуу байдал тогтоох, дайсны нисгэгчгүй төхөөрөмж болон пуужинг замаас нь барьж устгахад идэвхтэй ашиглаж байгаа юм.
Оросын цэргийн нисэх хүчний хамгийн шилдэг техникт тооцогддог хоёр сөнөөгч онгоц нэгэн зэрэг сүйрсэн нь тус улсын Агаарын-сансрын хүчинд томоохон гарз хохирол учруулжээ. Цаашид ослын шалтгааныг нарийвчлан тогтоох мөрдөн шалгах ажиллагаа үргэлжлэх бөгөөд энэ нь нисгэгчдийн алдаа, эсвэл техникийн саатлаас үүдэлтэй эсэх нь удахгүй тодорхой болох юм.
Эх сурвалж:
• nv.ua
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.