Хятадын тэрбумтныг хордуулж алсан гүйцэтгэх захирал асны цаазын ялыг гүйцэтгэжээ
БНХАУ-ын "Yoozoo Games" компанийн гүйцэтгэх захирал асан Шюй Яогийн өөрийн дарга, 39 настай тэрбумтан Лин Чиг хордуулж алсан хэрэгт нь оноосон цаазаар авах ялыг гүйцэтгэжээ.
Энэхүү онц ноцтой гэмт хэрэг нь 2020 онд гарсан бөгөөд Шанхай хотын шүүхээс оноосон цаазаар авах ялыг 2026 оны тавдугаар сарын 21-ний өдөр гүйцэтгэсэн болохыг тус шүүх болон олон улсын хэвлэлүүд албан ёсоор баталгаажуулсан байна.
Уг аллага нь ажлын байрны ширүүн маргаанаас үүдэлтэй байжээ.
2018 онд Лин Чи нь Шюй Яог компанийн шинжлэх ухааны уран зөгнөлт төслүүдийг хариуцсан "Three-Body Universe" охин компанийн удирдлагаар томилсон байна. Гэвч 2020 онд тэдний харилцаа муудаж, Шюй Яо "Netflix" компанитай томоохон гэрээ байгуулахад чухал үүрэг гүйцэтгэсэн хэдий ч түүнийг албан тушаал бууруулж, эрх мэдлийг нь хязгаарласан байна. Үүнд өширхсөн Шюй Яо алдарт "Breaking Bad" цувралаас сэдэвлэн Шанхай хотын захын дүүрэгт нууц лаборатори байгуулж, үхүүлэх үйлчилгээтэй хорт бодисуудыг туршиж эхэлжээ. Тэрээр мөнгөн ус болон загасны мэдрэлийн хор зэрэг үхэлд хүргэх аюултай бодисуудыг ашигтай бактери буюу пробиотик эм хэлбэрт оруулан даргадаа өгсөн байна.
Лин Чи 2020 оны 12 дугаар сард хордож, эмнэлэгт хүргэгдсэнээсээ хойш 9-10 хоногийн дараа нас барсан юм.
Шүүхийн мөрдөн байцаалтын явцад Шюй Яо нь зөвхөн даргаасаа гадна 2020 оны 9-өөс 12 дугаар сарын хооронд "Yoozoo Games" компанийн өөр дөрвөн ажилтны уух зүйлд хор хольсон болох нь тогтоогдсон бөгөөд азаар тэдгээр хүмүүс амьд үлджээ. Шанхай хотын Нэгдүгээр дунд шатны ардын шүүхээс түүний үйлдлийг "онц хэрцгий, жигшүүртэй" хэмээн тодорхойлж, 2024 оны 3 дугаар сарын 22-ны өдөр цаазаар авах ял оноосон аж.
"Yoozoo Games" компани нь Хятадын алдартай зохиолч Лю Цышиний "Гурван биет" (3 Body Problem) шинжлэх ухааны уран зөгнөлт цувралын дэлгэцийн эрхийг эзэмшдэг байв. Уг эрхийг "Netflix" компанид шилжүүлснээр 2024 онд дэлхий даяар амжилт олсон цуврал бүтээгдсэн бөгөөд талийгаач Лин Чиг уг цувралын гүйцэтгэх продюсероор нэхэн тэмдэглэсэн байдаг. Мөн тус компани өмнө нь "Game of Thrones: Winter Is Coming" стратегийн видео тоглоомыг хөгжүүлж, дэлхийн зах зээлд өндөр амжилт гаргаж байжээ.
Шюй Яогийн цаазын ялыг гүйцэтгэсэн тухай мэдээлэл цацагдсаны дараа "Three-Body Universe" компаниас албан ёсны мэдэгдэл гаргаж, шударга ёс эцэстээ тогтсоныг онцолжээ.
Тус компани үүсгэн байгуулагчаа гүнээ хүндэтгэн дурсаж, гэр бүлд нь эмгэнэл илэрхийлэхийн сацуу шүүх үйл явц хараат бус, шударга явагдсанд талархаж буйгаа илэрхийлжээ. Энэхүү үйл явдал нь бизнесийн орчин дахь эрх мэдлийн төлөөх тэмцэл ямар аймшигтай үр дагаварт хүрч болохыг харуулсан нэгэн хэрэг бөгөөд цаашид томоохон корпорациудын дотоод аюулгүй байдал, ёс зүйн асуудалд шинэ стандарт тогтоох шаардлагатайг сануулсан түүхэн сургамж болж үлдэж байгаа юм.
Эх сурвалж:
• ign.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.