Жуулчдыг онилсон хиймэл оюун ухаанд суурилсан залилангийн шинэ аргууд тахал мэт тархаж байна
Аюулгүй байдлын шинжээчид болон аялал жуулчлалын судлаачид 2026 оны дөрөвдүгээр сарын байдлаар жуулчдыг онилсон залилангийн шинэ схемүүд эрчимжиж байгааг анхаарууллаа.
Гэмт этгээдүүд уламжлалт сэтгэл зүйн дарамт шахалтын аргуудыг хиймэл оюун ухааны дэвшилтэт технологитой хослуулан ашиглаж, дэлхийн өнцөг булан бүрт аялагчдыг хохироох тохиолдол эрс нэмэгдсэн байна.
Хамгийн ноцтой аюулуудын нэг нь өндөр технологид суурилсан залилан юм.
Гэмт хэрэгтнүүд жуулчны нийгмийн сүлжээн дэх дуу хоолойны богино бичлэгийг ашиглан "дижитал ихэр"-ийг нь бүтээж, ар гэрийнхэн рүү нь залгаж яаралтай мөнгө шилжүүлэхийг шаарддаг болжээ. Мөн, гаалийн болон цагдаагийн ажилтны дүр эсгэн хуурамч видео дуудлага хийж, хууль бус эд зүйл илэрсэн хэмээн сүрдүүлж, барьцааны мөнгийг криптовалютаар нэхэх "дижитал баривчилгаа"-ны арга түгээмэл болсон байна. Түүнчлэн хиймэл оюун ухаан ашиглан алдартай зочид буудал захиалгын сайтуудыг дуурайлган хийж, хуурамч үнэлгээ, зураг байршуулан хүмүүсийг төөрөгдүүлж байна.
Технологийн халдлагаас гадна бодит орчин дахь эрсдэлүүд хэлбэрээ өөрчилжээ.
Турк, Франц зэрэг улсын нисэх буудлуудад албан ёсны үйлчилгээний логог ашигласан хуурамч таксины жолооч нар төөрүүлэх, тоолуур эвдэрсэн нэрийдлээр өндөр төлбөр нэхэх явдал ихэссэн байна. Ром, Барселона зэрэг Европын алдартай хотуудад халаасны хулгайчид бэлэн мөнгөнөөс илүүтэй банкны аппликейшн, цахим тасалбарын түлхүүр болсон ухаалаг гар утсыг гол бай болгох болжээ.
Цахим орчинд жуулчдын олноор очдог газруудын албан ёсны QR кодыг хуурамчаар сольж наах, түрээсийн автомашины зам ашигласны төлбөр нэхсэн хуурамч мессеж илгээх зэргээр банкны картын мэдээллийг хулгайлж байна.
Аюулгүй байдлын тайланд дурдсанаар цахим залилангийн хамгийн өндөр эрсдэлтэй бүс нутгаар Непал, Өмнөд Африк, Мексик, Энэтхэг болон Куба улсууд нэрлэгдэж байна. Харин гудамжны уламжлалт залилан, хулгайн гэмт хэргийн гаралтаар Итали, Испани, Турк улсууд тэргүүлсэн хэвээр байна. Үүнээс гадна шөнийн цагаар зочид буудлын ажилтны нэр барьж өрөө рүү залгаж картын мэдээлэл шаардах, эсвэл хямдралтай аяллын багц санал болгож урьдчилгаа мөнгө аваад алга болох тохиолдлууд ч бүртгэгдсээр байна.
Эдгээр өсөн нэмэгдэж буй эрсдэлээс сэргийлэхийн тулд мэргэжилтнүүд хэд хэдэн чухал зөвлөмжийг өгч байна.
Гэр бүлийн гишүүдтэйгээ яаралтай үед ашиглах нууц үг тохиролцох, QR код уншуулахаас татгалзаж цахим хаягийг гараар шивж оруулах, мөн нислэгийн болон төлбөрийн мэдээллийг зөвхөн албан ёсны аппликейшнээр шалгах нь зүйтэй гэж зөвлөж байна. Аливаа сэжигтэй дуудлага ирсэн тохиолдолд шууд утсаа тасалж, зочид буудлын угтах хэсэгт биечлэн очиж мэдээллийг нягтлах нь таны аюулгүй байдлыг хангах үндсэн алхам болно.
Эх сурвалж:
• news.ru
• aarp.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.