Орос хэлтнүүдэд зориулсан элит сургууль дампуурч, үйл ажиллагаагаа зогсоов
Орос хэлтнүүдийн хүүхдүүдэд зориулсан Орос-Францын хувийн "Le Sallay" сургууль санхүүгийн хүндрэлд орж, 2026 оны дөрөвдүгээр сарын 30-ны өдөр үйл ажиллагаагаа бүрмөсөн зогсоосноо албан ёсоор мэдэгджээ.
Сургуулийн үүсгэн байгуулагч, зохиолч Сергей Кузнецов Төлөөлөн удирдах зөвлөл дампуурал зарлах шийдвэр гаргасныг олон нийтийн сүлжээгээр дамжуулан танилцуулсан бөгөөд АНУ-ын Делавэр мужийн Дампуурлын шүүхэд холбогдох өргөдлөө өгчээ.
Сургуулийн гэнэтийн хаалт 100 орчим сурагч болон хэд хэдэн багш, ажилтнуудад хүндээр тусаад байна. Багш нарт хичээл эхлэхээс ердөө 10 минутын өмнө ажлын групп чатаар үйл ажиллагаа зогссон тухай мэдэгджээ. Жилийн сургалтын төлбөр нь 10-35,000 еврогийн хооронд хэлбэлздэг байсан бөгөөд эцэг эхчүүд их хэмжээний мөнгөөр хохирч, зарим нь 2026-2027 оны хичээлийн жилийн төлбөрөө урьдчилан төлөхөөр зээл хүртэл авсан байжээ. Хэдийгээр одоогийн сурагчдад диплом олгож амжсан ч Францад болох байсан төгсөлтийн баяр цуцлагдаж, хичээлийн жил хугацаанаасаа өмнө өндөрлөсөн байна.
Үүсгэн байгуулагч Сергей Кузнецов болон Екатерина Кадиева нар байгууллагынхаа уналтыг түүхэн болон геополитикийн хүчин зүйлстэй холбон тайлбарлав. 2018 онд буюу "Ковид-19" цар тахлын өмнөхөн нээгдсэн уг сургууль дараалсан олон улсын хямралуудтай нүүр тулсан бөгөөд Иранд эхэлсэн дайн нь сүйрэлд хүргэсэн эцсийн цохилт болсон гэж Кузнецов онцолжээ.
Гэвч Төлөөлөн удирдах зөвлөлийн гишүүн асан Александр Гаврилов санхүүгийн загварыг шүүмжилж, өндөр төлбөртэй хэдий ч байнга алдагдалтай ажиллаж байсныг илчилсэн юм. Тэрээр удирдлагууд дампуурах нь тодорхой болсон үед ч эцэг эхчүүдээс урьдчилгаа төлбөр авсаар байсныг буруутгасан байна.
Сургууль гэнэт хаагдсан явдал цагаачдын нийгэмлэгт хүчтэй эсэргүүцэл дагуулж эхэллээ.
Шүүмжлэгчид болон хохирсон эцэг эхчүүд захиргааг ил тод бус байсан, ялангуяа дампуурлын ирмэгт ирсэн үедээ дүрвэгсдийн хөтөлбөрт зориулсан хандив болон урьдчилгаа төлбөр цуглуулсаар байсанд бухимдаж байгаагаа илэрхийлэв. Үүсгэн байгуулагчид эцсийн мөч хүртэл нөхцөл байдлын ноцтойг бүрэн ухамсарлаагүй хэмээн өөрсдийгөө өмгөөлжээ.
Олон сарын цалингаа авч чадаагүй багш нар болон урьдчилгаа төлбөрөө алдсан эцэг эхчүүдийн хохирлыг хэрхэн барагдуулах нь шүүхийн шийдвэрээс хамаарах бөгөөд энэ нь цагаачдын нийгэмлэг дэх итгэлцэлд томоохон сэв суулгасан үйл явдал болж үлдлээ.
Эх сурвалж:
• life.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.