Энэтхэгийн тэрбумтны хүү Пабло Эскобарын 80 усны үхрийг аврах санал гаргажээ
Энэтхэгийн тэрбумтан Мукеш Амбанигийн 31 настай хүү Анант Амбани Колумб улсад устгагдах шийдвэр гараад байсан 80 усны үхрийг аврах саналыг 2026 оны 4-р сарын 28-ны өдөр гаргажээ.
Тэрээр эдгээр амьтдыг өөрийн зардлаар Энэтхэг улс дахь амьтан асрах төв рүү аюулгүйгээр нүүлгэн шилжүүлэх хүсэлтээ Колумбын засгийн газарт уламжилсан байна.
Эдгээр усны үхрүүд нь 1980-аад онд хар тамхины томоохон бүлэглэлийн толгойлогч Пабло Эскобарын Колумб дахь "Hacienda Nápoles" эдлэн газартаа авчирч тэжээж байсан амьтдын үр төл юм.
1993 онд Эскобарыг нас барсны дараа усны үхрүүд Магдалена голын сав газраар тархаж, өдгөө тоо толгой нь 200 орчимд хүрээд байгаа аж.
Өмнөд Америкт тэднийг барьж идэх байгалийн махчин амьтан байдаггүй тул түрэмгий төрөл зүйлд тооцогдож, нутгийн загасчдын амь насанд заналхийлэх, гол мөрнийг бохирдуулах, уугуул амьтдын амьдрах орчныг сүйтгэх зэрэг ноцтой асуудлуудыг дагуулсаар иржээ.
Колумбын засгийн газар амьтдад үр тогтоохын эсрэг эм тариа хэрэглэх зэрэг арга хэмжээ авсан ч үр дүнд хүрээгүй тул саяхан 80 усны үхрийг устгах шийдвэр гаргасан юм.
Өмнө нь тэднийг өөр улс руу шилжүүлэхэд 3.5 сая ам.доллар шаардлагатай гэсэн тооцоо гарч, уг ажил зогсоод байв. Харин Анант Амбани энэ талаар "Эдгээр 80 усны үхэр хаана төрөхөө өөрсдөө сонгоогүй. Тэд бол амьд бодгаль бөгөөд хэрэв бидэнд тэднийг аврах боломж байгаа бол хичээх үүрэгтэй" хэмээн мэдэгдэж, мал эмнэлгийн өндөр хяналт дор нүүлгэн шилжүүлэх төлөвлөгөөгөө танилцуулжээ.
Хэрэв Колумбын тал зөвшөөрвөл тус бүр нь 4.5 тонн хүртэл жин татдаг усны үхрүүдийг Энэтхэгийн Гужарат муж дахь "Vantara" зэрлэг амьтдыг авран хамгаалах төвд хүргэх юм. Анант Амбанигийн үүсгэн байгуулсан 3,500 акр талбай бүхий тус төвд одоогоор заан, бар, арслан, ирвэс, матар зэрэг 2,000 гаруй төрөл зүйлийн амьтад амьдардаг.
Гэвч зэрлэг амьтан судлаачдын зүгээс Гужарат мужийн зуны улирлын температур 40°C-ээс давж халдаг нь усны үхрүүдийн эрүүл мэндэд сөргөөр нөлөөлж болзошгүйг анхааруулж байна.
Одоогоор Колумбын засгийн газар Амбанигийн саналд албан ёсны хариу өгөөгүй байна.
Тус улсын Байгаль орчны сайдын үүрэг гүйцэтгэгч Ирен Велез өмнө нь эдгээр амьтдыг хүлээж авах улс олдохгүй байгааг онцолж, хэрэв яаралтай арга хэмжээ авахгүй бол 2030 он гэхэд усны үхрийн тоо толгой 500-д хүрч, экологийн ноцтой сүйрэлд хүргэх эрсдэлтэйг сануулж байсан юм. Энэхүү аврах ажиллагаа хэрэгжсэнээр олон улсын амьтан хамгааллын салбарт томоохон жишиг болох хүлээлттэй байна.
Эх сурвалж:
• dawn.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.