Японы багш сурагчдаа нууцаар бичлэг хийсэн хэргээр хорих ял сонсов
Японы Нагоя хотын дүүргийн шүүхээс Канагава мужийн дунд сургуулийн багш асан 28 настай Кацуя Ишикавад сурагчдынхаа зүй бус дүрсийг нууцаар хальсанд буулгаж, бусдад тараасан хэргээр 2026 оны дөрөвдүгээр сарын 14-ний өдөр хоёр жилийн хорих ял оноожээ. Энэ нь тус улсад дуулиан тариад буй багш нарын нууц бүлэглэлийн гишүүдэд өгсөн анхны биечлэн эдлэх ял болж байна.
Хэргийн материалыг сөхвөл, тэрээр 2024 оны долоодугаар сараас арванхоёрдугаар сарын хооронд бага сургуульд ажиллаж байх хугацаандаа гурван эмэгтэй сурагчийн дотуур хувцсыг нууцаар зургийн аппаратад буулгажээ. Улмаар эдгээр дүрс бичлэг болон хохирогчдын царайг Токио зэрэг таван мужийн долоон багшаас бүрдсэн цахим сүлжээний нууц группт хуваалцсан байна. Түүнчлэн 2025 оны наймдугаар сард Камакура хотын галт тэрэгний буудлын урсдаг шатан дээр 14 настай охины биед халдаж, хувцасны доороос бичлэг хийсэн болох нь тогтоогджээ.
Шүүгч Кёоко Ириэ шийдвэрээ танилцуулах үеэрээ шүүгдэгч нь сурагчдыг хамгаалах үүргээсээ няцаж, тэднийг бэлгийн гэмт хэргийн бай болгосныг хатуу буруушаав. Мөн эдгээр зүй бус зургууд цахим орчинд өргөнөөр тархаж, хохирогчдод насан туршийн айдас, сэтгэл санааны гүн хохирол учруулах ноцтой эрсдэл дагуулсныг онцолсон юм.
Шүүх хуралд оролцсон хохирогчдын ар гэрийнхэн маш их гомдолтой байгаагаа илэрхийлж, нэгэн охины ээж зургууд хэзээ нэгэн цагт задарч магадгүй гэх айдсыг насан туршдаа тээж амьдрах болсноо мэдүүлжээ.
Уг хэрэг нь Японы сургуулиуд дахь бэлгийн хүчирхийллийн эсрэг авч хэрэгжүүлж буй томоохон тэмцлийн нэг хэсэг болж байна. Дээрх нууц бүлэглэлийн үйл ажиллагаа илчлэгдсэний дараа буюу 2026 оны эхээр тус улсын Боловсролын яамнаас сургуулийн орчинд нууц камер байгаа эсэхийг тогтмол шалгах, ёс зүйн зөрчил гаргасан багшийг шууд ажлаас нь халах зэрэг хатуу арга хэмжээнүүдийг хэрэгжүүлж эхэлжээ. Бүлэглэлийн бусад гишүүд тэнсэн харгалзах ял сонссон бол Кацуя Ишикавагийн үйлдэл нь онц ноцтой, давтан үйлдэгдсэн шинжтэй байсан тул ийнхүү биечлэн эдлэх хорих ялаар шийтгүүлсэн байна.
Сэтгэгдэл (1)