Киевийн дэлгүүрт зэвсэгт халдлага гарч зургаан хүн амиа алджээ
Украины нийслэл Киев хотын өмнөд хэсэгт байрлах Голосеевский дүүрэгт зэвсэглэсэн этгээд галт зэвсэг хэрэглэн олон хүний аминд хүрсэн ноцтой хэрэг гарчээ.
Уг халдлагын улмаас нийт зургаан хүн амь үрэгдэж, 14 хүн шархадсан бөгөөд цагдаагийн тусгай тасаг барьцаалагчийг устгаснаар ажиллагааг зогсоосон байна.
Хэрэг явдал бямба гарагт эхэлсэн бөгөөд халдлага үйлдэгч эхлээд өөрийн амьдардаг орон сууцанд гал тавьсныхаа дараа гудамжинд гарч иржээ. Тэрээр гартаа байсан богино голтой автомат буугаар ойр орчмын хүмүүс рүү шууд гал нээж, дөрвөн хүнийг газар дээр нь хөнөөсөн байна. Үүний дараа ойролцоох супермаркет руу орж, хэд хэдэн хүнийг барьцаалан өөрийгөө тусгаарлажээ.
Цагдаагийн тусгай хүчнийхэн болон хэлэлцээр хийгчид барилгыг бүсэлж, 40 орчим минут үргэлжилсэн хурцадмал байдал үүссэн байна. Гэмт этгээд шархадсан хүмүүст эмнэлгийн тусламж үзүүлэхийг зөвшөөрөөгүй бөгөөд нэг барьцааны хүнийг хөнөөсний дараа цагдаа нар дайралт хийж түүнийг устгажээ. Халдлагын улмаас гудамжинд дөрөв, дэлгүүр дотор нэг хүн амиа алдсан бол 30 орчим насны нэг эмэгтэй эмнэлэгт хүргэгдсэнийхээ дараа шархаа даалгүй нас барсан байна. Шархадсан 14 хүний дунд эцэг эхээ алдсан 12 настай хүү, мөн угаарын хийнд хордсон дөрвөн сартай нярай байгаа аж.
Гэмт этгээд нь 1968 онд Москвад төрсөн, Оросын эзэмшилд буй Донецк мужид удаан хугацаанд амьдарсан 58 настай эрэгтэй болохыг тогтоожээ. Тэрээр урьд нь эрүүгийн хэрэгт холбогдож байсан бөгөөд халдлагадаа хууль ёсны бүртгэлтэй галт зэвсэг ашигласан байна.
Одоогоор түүний сэдэл тодорхойгүй байгаа ч Украины Аюулгүй байдлын алба (SBU) уг хэргийг терроризм байж болзошгүй гэж үзэн мөрдөн шалгах ажиллагааг эхлүүлээд байна.
Украины Ерөнхийлөгч Владимир Зеленский оройн мэдэгдэлдээ энэ үйл явдлыг нийслэл хотод гарсан цочирдом, ховор хэрэг хэмээн тодорхойлж, хохирогчдын ар гэрийнхэнд эмгэнэл илэрхийлэв.
Түүнчлэн гэмт хэрэгтэн хэрхэн галт зэвсэг эзэмших зөвшөөрөл авсныг яаралтай шалгахыг үүрэг болгосон байна. Дотоод хэргийн сайд Игорь Клименко болон хотын дарга Виталий Кличко нар нөхцөл байдлын талаар мэдээлэл өгсөн бөгөөд одоогоор Голосеевский дүүрэгт цагдаагийн өндөржүүлсэн хамгаалалт гарч, хэргийн газарт шинжээчид ажиллаж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.