"Эвергранд" группийг үүсгэн байгуулагч санхүүгийн гэмт хэрэг үйлдсэнээ хүлээн зөвшөөрөв
Хятадын үл хөдлөх хөрөнгийн салбарт хямрал дагуулсан "Эвергранд" (China Evergrande Group) группийг үүсгэн байгуулагч Хуй Ка Янь буюу Шю Жяинь өөрт тулгасан олон тооны санхүүгийн гэмт хэргийг үйлдсэнээ албан ёсоор хүлээн зөвшөөрчээ.
Гуандун мужийн Шэньжэнь хотын Дунд шатны ардын шүүхэд энэ сарын 13, 14-ний өдрүүдэд болсон нээлттэй шүүх хурлын үеэр 67 настай тэрбумтан асан эцсийн үгээ хэлэхдээ гэм буруугаа хүлээн зөвшөөрч, хийсэн хэрэгтээ гэмшиж байгаагаа илэрхийлсэн байна.
Тэрээр компанийн удирдлагын түвшинд хэд хэдэн ноцтой гэмт хэрэг үйлдсэн хэмээн буруутгагдсан юм. Үүнд хөрөнгө босгох зорилгоор залилан мэхлэх, олон нийтийн хадгаламжийг хууль бусаар татах, байгууллагын хөрөнгийг шамшигдуулах, авлига өгөх зэрэг зүйл ангиуд багтжээ. Мөн үнэт цаасыг хуурамчаар гаргах, хууль бус зээл олгох, орон сууц худалдан авагчдын урьдчилгаа төлбөрийг зориулалтын бусаар зарцуулах, санхүүгийн чухал мэдээллийг хууль бусаар задруулах зэрэг хэргүүдийг үйлдсэнээ шүүхийн танхимд баталсан байна.
Энэхүү шүүх хуралд Хуй Ка Яниас гадна "Эвергранд" групп болон түүний эх газрын Хятад дахь гол охин компани болох "Хэнда Реал Эстэйт" (Hengda Real Estate) мөн яллагдагчаар татагджээ. Эдгээр хуулийн этгээдүүд нь үнэт цаас хуурамчаар гаргасан, хууль бус зээл олгосон, байгууллагын авлигын хэрэгт холбогдсон байна.
Нэгэн цагт буюу 2017 онд 42 тэрбум ам.долларын хөрөнгөөрөө Азийн хамгийн баян хүнд тооцогдож байсан тэрээр 2023 оны есдүгээр сараас хойш хууль бус гэмт хэрэгт сэжиглэгдэн нууц байршилд саатуулагдаад байсан юм.
Түүний удирдлага дор "Эвергранд" компани Хятадын хамгийн том бүтээн байгуулагч болохын тулд асар их хэмжээний өр тавьж, оргил үедээ 332 тэрбум ам.долларын өр төлбөртэй болсон байв. Улмаар 2021 оны сүүлээр дампуурлаа зарласнаар 1300 гаруй дуусаагүй төсөл зогсож, сая сая гэр бүл урьдчилгаагаа төлсөн орон сууцаа авч чадахгүй хохирчээ. Үүний дараа 2024 оны эхээр Хятадын үнэт цаасны зохицуулах хорооноос тус компанийг борлуулалтын орлогоо 78 тэрбум ам.доллароор хиймлээр өсгөсөн болохыг тогтоож, Хуй Ка Янийг 6.5 сая ам.доллароор торгон, хөрөнгийн зах зээлд оролцох эрхийг нь бүх насаар нь хассан түүхтэй.
Олон жилийн турш бүтцийн өөрчлөлт хийх гэж оролдсон ч амжилтад хүрээгүй тул Хонконгийн шүүх 2024 оны нэгдүгээр сард "Эвергранд" компанийг татан буулгах шийдвэр гаргасан бөгөөд 2025 оны наймдугаар сард Хонконгийн хөрөнгийн биржийн бүртгэлээс албан ёсоор хасагдсан юм. Одоогийн байдлаар татан буулгах ажиллагааг хариуцсан мэргэжилтнүүд Хуй болон бусад удирдлагуудад өмнө нь олгосон 6 тэрбум ам.долларын ногдол ашиг, урамшууллыг буцаан авахаар тэмцэж байна.
Шэньжэнь хотын шүүхээс түүнд хүлээлгэх эцсийн ял шийтгэлийн хэмжээг товлосон хугацаанд жич зарлах болно гэдгээ мэдэгджээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.