Францын эрэгт 45 мянга гаруй далайн шувуу хорогджээ

Францын Атлантын далайн эрэг дагуу 45,000 гаруй далайн шувуу олноор хорогдсон нь сүүлийн арван жилд тохиолдоогүй томоохон экологийн сүйрэл боллоо.

Байгаль хамгаалагчдын мэдээлснээр, улаан номд орсон Атлантын мухар өвөөлж (Atlantic puffin) тэргүүтэй шувууд дараалсан хүчтэй шуурга, өлсгөлөнгийн улмаас ийнхүү олноор энджээ.

Орон нутгийн "Шувуу хамгаалах лиг" (LPO) болон "Ici" радио станцын хамтарсан мэдээллээр энэхүү гамшигт үзэгдэл өнгөрсөн гурван сарын хугацаанд үргэлжилж, дөрөвдүгээр сарын дунд үед оргил цэгтээ хүрсэн байна. Амь үрэгдсэн шувуудын дийлэнх хувийг ховордсон төрөл зүйл болох Атлантын мухар өвөөлж эзэлж байгаа бөгөөд үүнээс гадна кайр, гагарка, моевка зэрэг бусад төрлийн далайн шувууд их хэмжээгээр өртжээ.

Шувууд олноор хорогдох болсон үндсэн шалтгааныг өвлийн улиралд удаан хугацаагаар үргэлжилсэн "Горетти", "Ингрид", "Чандра" зэрэг хүчтэй шуургатай холбон тайлбарлаж байна.

Далайн өндөр давалгаа, булингартай ус нь шувуудын гол идэш тэжээл болох жижиг загас агнах боломжийг бүрэн хаажээ. Үүний улмаас амьтад задгай тэнгист байгалийн гамшигтай тэмцэж, туйлдаж ядарсны эцэст өлсгөлөнгөөр амиа алдсан байна.

Цаг агаарын эрс тэс нөхцөл байдлаас гадна хүрээлэн буй орчны бохирдол тодорхой хэмжээгээр нөлөөлсөн болохыг мэргэжилтнүүд тогтоожээ. Зарим тохиолдолд үхсэн шувуудын өд газрын тосны бүтээгдэхүүнээр бохирдсон байсан нь дулаан тусгаарлах чадварыг нь алдагдуулж, хөлдөж үхэх эрсдэлийг нэмэгдүүлсэн байна.

Энэхүү үйл явдал нь уур амьсгалын өөрчлөлт болон Атлантын далай дахь хэвийн бус шуурганы идэвхжил байгаль экологид хэрхэн ноцтой хохирол учруулж болохыг харуулсан тод жишээ боллоо. Судлаачид үүнийг энэ оны хамгийн том экологийн гамшиг хэмээн тодорхойлж байгаа бөгөөд цаашид далайн экосистем болон ховордсон амьтдыг хамгаалах чиглэлд олон улсын түвшинд яаралтай арга хэмжээ авах шаардлагатайг анхааруулж байна.

Эх сурвалж:

• theguardian.com

• news.sarbc.ru

• intra.biysk.ru

• fontanka.ru

• tsn.ua