О.Батбаяр: Онц шаардлагагүй бол иргэд эмийн багц заавал авах гээд байх шаардлагагүй

Эрүүл мэндийн яам коронавируст халдварын талаар мэдээлэл өгөх үеэр ЭМ-ийн сайдын зөвлөх О.Батбаяр эмийн багцтай холбоотой сэтгүүлчийн асуултад дараах тайлбарыг өглөө. 

Эрүүл мэндийн сайдын зөвлөх О.Батбаяр:

-Эрүүл мэндийн даатгалын сангаас дахиж өвдсөн хүмүүст эмийн багц олгож байгаа. Зөвхөн өнгөрсөн он гэхэд ӨЭМТ-өөр дамжуулж олгож байгаа эмийн багцын 160,000 төгрөгт эм болон өрхийн эрүүл мэндийн төвийн эмчилгээний зардал, ажлын хөлс бүгд багтсан. Үүнд 60 тэрбум гаруй төгрөг зарцуулсан. 

Харин энэ удаа Омикрон хувилбарын илүү хөнгөн явж байгаа, вакцинжуулалт өндөр байгаа болохоор томуу, томуу төст бусад өвчний адил гэртээ тусгаарлагдаад 38 хэмээс дээш халуурвал халууны эмээ уугаад, хоолойгоо зайлаад, хэрэв их ханиалгавал ханиадны эсрэг эм уугаад эдгэх боломжтой байгаа. 

Иргэн болгон эмийн багц авна гээд багцаа аваад байвал Эрүүл мэндийн даатгалын санд байгаа таны бусад тусламж үйлчилгээнд зарцуулагдах ёстой мөнгө чинь л хорогдоно гэсэн үг. Хэдий коронавирусийн эсрэг эмийн багцыг олгож байгаа ч иргэд онц шаардлагагүй бол энэ багцыг заавал авах гээд байх шаардлагагүй байх гэж бодож байна.