54 настай эмэгтэй 22 жилийн өмнө хөлдөөсөн үр хөврөлөө суулгуулж, эрүүл хүүхэд төрүүлжээ
Грек Улсад 54 настай эмэгтэй 22 гаруй жилийн турш гүн хөлдөөсөн өөрийн үр хөврөлөө шилжүүлэн суулгуулж, эрүүл хүүхэд төрүүлсэн нь анагаах ухааны салбарт онцгой үйл явдал болсон тухай “Kathimerini” сонин мэдээллээ.
Афин хотын оршин суугч Кристина Рапти-Дзелепи 3490 грамм жинтэй охин төрүүлсэн бөгөөд эх болон хүүхдийн биеийн байдал сайн, төрөлт ямар нэгэн хүндрэлгүй явагдсан байна.
Уг үр хөврөлийг анх 2004 оны гуравдугаар сарын 17-ны өдөр үргүйдлийг эмчлэх хиймэл үр суулгах хөтөлбөрийн хүрээнд гүн хөлдөөлтөд оруулж байжээ. Тухайн үед хийгдсэн шилжүүлэн суулгалтаар тэрбээр хүүгээ төрүүлсэн бөгөөд үлдсэн үр хөврөлүүдийг тусгай лабораторийн орчинд хадгалуулсан байна. Ийнхүү үр хөврөлийг хөлдөөсөн өдрөөс хойш охин мэндлэх хүртэл нийт 22 жил, 5 сар, 23 өдрийн хугацаа өнгөрчээ.
Эмэгтэй дахин хүүхэд төрүүлэхээр шийдсэн нь гэр бүлд нь тохиосон уй гашуутай холбоотой юм байна. Тодруулбал, 2025 оны аравдугаар сард түүний 21 настай хүү нь зам тээврийн ослоор нас барсан тул тэрбээр дахин хүүхэд төрүүлэх зоримог алхам хийжээ.
Энэхүү тохиолдол нь олон улсын анагаах ухааны практикт үр хөврөл хамгийн урт хугацаанд хадгалагдсан дэлхийн дээд амжилт болж байгааг мэргэжилтнүүд баталлаа. Грекийн Нөхөн үржихүйн анагаах ухааны нийгэмлэгийн ерөнхий нарийн бичгийн дарга, эх барих эмэгтэйчүүдийн эмч Константинос Пантос уг явдлыг нөхөн үржихүйн салбарын томоохон дэвшил хэмээн үнэлсэн байна. Үүнээс өмнө эхийн өөрийн хөлдөөсөн үр хөврөлөөс хүүхэд мэндэлсэн хамгийн урт хугацаа Японд 18 жил 3 сар, Израильд 17 жилээр бүртгэгдэж байжээ.
Тус эмнэлгийн эмч нарын баг уг тохиолдлын эмнэлзүйн болон лабораторийн бүх нарийн судалгааг нэгтгэж байгаа бөгөөд олон улсын эрдэм шинжилгээний сэтгүүлд бүрэн хэмжээний эрдэм шинжилгээний өгүүлэл болгон нийтлүүлэхээр бэлтгэж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.