“Халуун сэдэв” ярилцлагын энэ удаагийн булангаар Швейцарь улсад ажиллаж амьдарч буй НҮБ-ын Хүний эрхийн дээд комиссарын Хөгжлийн хэлтсийн дарга А.Бат-Эрдэнэтэй холбогдож ярилцлаа.

НҮБ-ын Хүний эрхийн дээд комиссарын Хөгжлийн хэлтсийн дарга А.Бат-Эрдэнэ: 

-Өнөөдрийн байдлаар Швейцарь улсад коронавирусийн халдвараар 340 мянган хүн өвчилж, 260 мянган иргэн эдгэрч, 5000 орчим хүн нас барсан.

Тус улсад бүтэн болон хагас хөл хорио тогтоосон. Халдварын тохиолдол багассан үед хөл хориогоо бууруулж, албан байгууллагууд ажилласан бол бүтэн хөл хорио тогтоосон үед бол гэр гэртээ байж, гэрээсээ ажилласан. Гэхдээ бүтэн хөл хорионд байгаа энэ үед олон нийтийн газар явахгүй, амны хаалт зүүхийг зөвлөж байгаа. Хүмүүсийн хувьд гадаа гарч салхилж болж байгаа юм байна.

Түүнчлэн Франц зэрэг хөрш орон руу зорчихоор бол тусгай апп-д хандан, ямар зорилгоор, хэдий хугацаанд зорчих гэж буйгаа бөглөн код аван нэвтэрч байна. Дэлгүүр орж, гарахад нь гарыг нь ариутгаж зай барьж байгаа.

Швейцарь улсад цар тахалтай холбоотойгоор тусгай апп гарсан. Уг апп зохион бүтээсэн компани тухайн иргэний хувийн мэдээллийг төрийн байгууллагад өгөхгүй. Тус апп нь иргэн та вирустэй хүнтэй хавьтсан байна. Шинжилгээ өгч халдвартай бол гэртээ өөрийгөө 14 хоног тусгаарлах хэрэгтэй гэж зөвлөж байгаа. Тэрнээс бол тухайн хүн хаагуур явсан, ямар хүн гэдгийг олон нийтэд зарлахгүй.

Эмнэлэгт бол хүнд өвчтэй хүмүүсийг хүлээн авч байгаа. Халдвар илэрч гэртээ эмчлэгдэж байгаа иргэдэд толгой өвдөх, халуурах юм бол толгойны эм, халууны эм уухыг зөвлөж хамгийн гол нь сайн унтаж, амраад гэртээ агаар сэлгэлт хийхийг зөвлөж байна.

Монгол Улсад хүний эрхийг маш ихээр зөрчиж байна.

Халдвартай иргэнийг зарлаж, явсан зам мөрийг нь олон нийтэд дэлгэж, цаашлаад байр олон сууц, хаалгаар нь энэ хүн халдвартай гэж зарлан 14 хоногийн тусгаарлалтын бичиг нааж байгаа нь хүний эрхийг маш их зөрчиж байна.

Харин ч ингэх тусам иргэд халдвараа нууж, халдвар тархах улам эрсдэлтэй. Үүд хаалга дээр нь бичиг наахаар би халдвартай гэж хэн ч мэдээлэл өгөхгүй.  Мэдээж гэртээ тусгаарлагдаж чадахгүй хэмээн үзэж байгаа нь итгэлийн асуудал. Төрдөө иргэд итгэхгүй, төр нь иргэдээ итгэхгүй байгаа явдал юм.

Европын орнуудад халдвар авсан иргэдийг 14 хоног тусгаарлах хэрэгтэй гэж байгаа. Манай улс шиг 21 хоног гэж байхгүй. 14 хоногийн хугацаанд халдвар бүрэн эдгэрээгүй бол дахин 14 хоног эмчилгээ хийхийг зөвлөдөг. Энэ бол маш цөөхөн тохиолдол. Цар тахлын энэ үед иргэд бухимдаж, сандарч болохгүй. Харин ч бие биенийгээ дэмжин, туслах нэгнээ хүндэтгэх хэрэгтэй гэв.

---