Хаан банкны гэрээт ажилчид эбола биш халуун орны хумхаа өвчин тусжээ

ХААН банкинд мэдээллийн технологийн чиглэлээр ажиллахаар ирсэн дөрвөн иргэний гурав нь өндөр халуурч “Интермед” эмнэлэгт өчигдөр ханджээ. Тэдний нэг болох 23 настай эрэгтэй өндөр халуурч, биеэр нь тууралт гарсан гэнэ. Зоонозын өвчин судлалын төвийнхөн нарийвчилсан шинжилгээ хийж үзэхэд шумуулаар дамждаг халуун орны хумхаа /маляр/ гэдгийг тогтоосон байна.

Зоонозын өвчин судлалын төвийнхөн нарийвчилсан шинжилгээ хийж үзэхэд шумуулаар дамждаг халуун орны хумхаа /маляр/ гэдгийг тогтоосон байна

Зарим хэвлэл мэдээллээр эбола вирусийн халдвартай иргэд байсан гэх мэдээлэл гарсан юм. Бид энэ дагуу “Интермед” эмнэлэгт очиход манайд тийм хүн хандаагүй, юун эбола вирустай хүн ирээгүй хэмээн тайлбарласан юм.

Энэ талаар Зоонозын өвчин судлалын үндэсний төвийн албаны хүнээс тодруулахад “Энэ сарын 31-нд энэтхэгээс дөрвөн иргэн ХААН банкинд ажиллахаар ирсэн. Ирэх үедээ өндөр халуунтай байсан тул шинжилгээ өгч, “Интермед” эмнэлэгт хэвтүүлсэн. Нэг энэтхэгийн биеэр нь тууралт гарч, халуунтай байсан. Шинжилгээгээр шумуулаар дамждаг хумхаа өвчин туссан байсныг тогтоосон. Энэтхэгээс ирэхдээ хазуулсан байх. Ирэх замдаа өндөр халуурч шинж тэмдэг нь илэрсэн байна. Энэ өвчин нь хүнээс хүнд халддагүй тул иргэд айж сандрах зүйлгүй. Одоогоор өвчтөний биеийн байдал сайн байгаа “Интермед” эмнэлэгт хэвтэн эмчлүүлж байна. Бусад гурван энэтхэг иргэний биеийн байдал сайн байгаа” хэмээв.

Манай улсад 2015 онд халуун орны хумхаа өвчин туссан нэг тохиолдод бүртгэгдэж байжээ.

ДЭМБ-ын мэдээллээр, 2016 онд дэлхийн 91 улсад хумхаа өвчнөөр өвчилсөн 216 сая тохиолдол бүртгэгдсэн ба уг өвчний улмаас 445 мянга орчим хүн амиа алджээ.