Тайландад цэцэрлэгт багшаар ажилладаг эхнэрээ буудсан цагдааг баривчилжээ
Тайландын Чонбури мужийн Банг Ламунг дүүрэгт байрлах цэцэрлэгийн байранд эхнэрээ буудан хөнөөсөн цагдаагийн дэслэгч 18 цаг үргэлжилсэн бүслэлтийн эцэст бууж өглөө. Тус хэрэг 2026 оны есдүгээр сарын 9-ний лхагва гаргийн өглөө 11:00 цагийн орчимд «Nong Pla Lai» хотын захиргааны харьяа цэцэрлэгт гарсан бөгөөд сэжигтэн нь тус дүүргийн цагдаагийн хэлтсийн гэмт хэргээс урьдчилан сэргийлэх, таслан зогсоох чиглэлийн дэд байцаагч, дэслэгч Татсапонг Тонгтат байсан юм.
Хохирогч нь сэжигтний 48 настай эхнэр бөгөөд цэцэрлэгийн хоолны танхимд зүүн чихнийхээ орчимд буудуулсан байдалтай амиа алджээ. Буун дуу гарсан даруйд цэцэрлэгт байсан 44 хүүхэд болон 3 багш, ажилтнуудыг сургуулийн байрнаас яаралтай нүүлгэн шилжүүлсэн байна. Сургуулийн удирдлагуудын шуурхай ажиллагааны үр дүнд хүүхдүүдээс нэг ч хүн гэмтэж бэртээгүй бөгөөд хэрэг явдалтай холбогдуулан цэцэрлэгийн сургалтын үйл ажиллагааг Баасан гараг хүртэл түр завсарлуулахаар шийдвэрлэжээ.
Хэрэг үйлдсэний дараа сэжигтэн ойролцоох хотхон дахь гэртээ очин бүгсэн тул цагдаагийн тусгай хүчнийхэн байшинг бүслэн, гэрэлтүүлэг байршуулан хэлэлцээ хийсэн байна. Энэхүү эгзэгтэй үед өмнөд нутгаас яаралтай ирсэн сэжигтний хүү болох цагдаагийн ажилтан хэлэлцээнд биечлэн оролцож, эцэгтэйгээ удаа дараа ярилцан бууж өгөхийг ятгажээ.
Нийт 18 орчим цаг үргэлжилсэн бүслэлтийн дараа нутгийнханд "Muad O" нэрээр танигдсан сэжигтэн 2026 оны есдүгээр сарын 10-ны пүрэв гаргийн өглөө 06:20 цагт галт зэвсгээ байшиндаа үлдээн цагдаа нарт тайван замаар бууж өгсөн байна. Хууль сахиулах байгууллагын зүгээс уг аллагын шалтгаан, сэдэлтийг эцэслэн тогтоохоор мөрдөн шалгах ажиллагааг үргэлжлүүлэн явуулж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.