Кенид 191 хүний амийг хөнөөсөн шашны гаж урсгалын тэргүүнийг буруутайд тооцов

Кенийн далайн эргийн Момбаса хотын шүүхээс 191 хүний амийг хөнөөсөн хэрэгт буруутгагдсан шашны гаж урсгалын тэргүүн Пол Маккензи болон түүний удирдлагад байсан 28 хүнд холбогдох хэргийг хэлэлцэж, тэднийг гэм буруутай гэж шийдвэрлэжээ. Шүүгч Диана Мочаче найман цагийн турш шийдвэрээ танилцуулсан бөгөөд амиа алдсан хохирогчдын нэгээс бусад нь бүгд бага насны хүүхдүүд байсан нь олон нийтийг цочроогоод байна.

Пол Маккензи нь 2003 онд “Good News International Ministries” нэртэй шашны байгууллагыг үүсгэн байгуулсан бөгөөд 2019 онд дагалдагчдаа Шакахола ой руу нүүлгэн шилжүүлжээ. Тэрээр итгэгчдэдээ өлсөж үхсэнээр Есүстэй уулзана хэмээн итгүүлж, хүүхдүүдэд боловсрол олгох болон орчин үеийн анагаах ухааны тусламж, эмчилгээ авахыг хатуу хориглож мунхруулдаг байв. Анх 2023 онд орон нутгийн малчид ойгоос хүний цогцоснууд олж илрүүлснээр цагдаагийн байгууллага шалгалтын ажиллагааг эхлүүлсэн түүхтэй.

Шүүх хуралдааны явцад ил болсон баримтуудаас үзвэл, тус бүлэглэл мацаг барихаас татгалзсан дагалдагчдыг зодож, өшиглөн тэнгэрт хүргэх ёстой гэж шахан дарамталдаг байжээ. Түүнчлэн амиа алдсан иргэдийг Есүстэй гэрлэж байна хэмээн үзэж, оршуулгын зан үйлийг "хурим" гэж нэрлэдэг байсан аж. Жирэмсэн эхэд амаржсаных нь дараа нярайгаа хөхүүлэхийг хориглосноос болж 12 хоногтой хүүхэд өлсгөлөнгөөр эндсэн бөгөөд дараа нь тус эхэд үлдсэн хүүхдүүдээ мөн өлсгөж үхүүлэхийг зааварлаж байсан ноцтой баримтууд тогтоогджээ.

Шашны гаж урсгалын хор уршгаар олон гэр бүл хүнд цохилтод орсон бөгөөд тэдний нэг болох 48 настай Стивен Мвити гэх иргэн зургаан хүүхдээ алдсан байна. Тэрээр урт хугацааны эрэл хайгуулын эцэст хүү Самуэлийнхээ цогцсыг олж оршуулж чадсан бөгөөд гэмт этгээдүүдийн буруутайг тогтоосон шүүхийн шийдвэрт сэтгэл хангалуун байгаагаа илэрхийлжээ.

Гэм буруутай нь нотлогдсон 29 этгээдэд оноох ялын хэмжээг эцэслэн тогтоох үйл явц үргэлжилж байгаа бөгөөд хохирогчдын ар гэрийнхэн шударга ёс бүрэн тогтоно гэдэгт найдаж байна.

Эх сурвалж:

• news.mn

• news.mn