Пакистаны Лахор хотод агаарын бохирдол гамшгийн түвшинд хүрчээ
Пакистаны зүүн болон Энэтхэгийн хойд бүс нутагт цаг агаар хүйтэрч, агаарын урсгал зогсонги байдалд орсны улмаас агаарын чанар эрс муудаж, утааны гамшгийн нөхцөл байдал үүсээд байна. Тухайлбал, өнөөдөр өглөө /2026.11.03/ Пакистаны Лахор хот дэлхийн хамгийн их бохирдолтой хотоор бүртгэгдэж, агаарын чанарын индекс нь 447-д хүрсэн талаар Швейцарын "IQAir" ажиглалтын байгууллага мэдээллээ.
Лахор хотын агаар дахь PM2.5 нарийн ширхэгт тоосонцрын хэмжээ Дэлхийн эрүүл мэндийн байгууллагаас зөвшөөрсөн жилийн дундаж аюулгүй хэмжээнээс 60 дахин нэмэгдсэн байна. Пакистаны эрх баригчдын тодруулснаар, агаарын температур огцом буурч, салхины хурд саарснаар утаа тортгийг сарниулах боломжгүй болж, хотын дээр өтгөн утаан хөшиг тогтжээ. Энэ төрлийн нарийн ширхэгт тоосонцор нь олон сая иргэний дунд амьсгалын замын болон зүрх судасны хүнд өвчлөл үүсгэх өндөр эрсдэлтэй байдаг.
Хил залгаа Энэтхэгийн Дели хотод мөн адил утааны манан суунаглаж байгаа тул орон нутгийн засаг захиргаанаас яаралтай хязгаарлалтын арга хэмжээнүүдийг хэрэгжүүлж эхэлжээ. Энэ долоо хоногоос эхлэн их хэмжээний утаа ялгаруулдаг автомашинуудын хөдөлгөөнийг хориглож, зарим төрлийн барилгын ажлыг түр зогсоосон байна. Түүнчлэн нийтийн хоолны газруудад нүүрс болон түлээний мод шатаахыг бүрэн хориглож, агаарын бохирдлыг бууруулах шат дараатай хяналтыг чангатгав.
Өмнөд Азийн энэ бүс нутагт өвлийн улирал эхлэх үед хүйтэн, хүнд агаарын давхарга газрын гадарга руу шахагдаж, тээврийн хэрэгслийн утаа, барилгын тоосжилт болон тариалангийн талбайн үлдэгдлийг шатаах утааг доогуур түгждэг байгалийн үзэгдэл жил бүр тохиолддог. Цаг уурын энэхүү хүнд нөхцөл байдал нь хоёр улсын хил дамнасан олон сая оршин суугчийн амьдрах орчин, эрүүл мэндэд шууд заналхийлж байна.
Энэ сарын 8-ны өдөр тохиох Хиндү шашны уламжлалт Дивали баяраар салют буудуулах нь агаарын чанарыг бүр ч дордуулна гэсэн болгоомжлол үүсээд байна. Үүнтэй холбогдуулан Энэтхэгийн Дээд шүүхээс урьдчилан сэргийлэх шийдвэр гаргаж, бага бохирдол үүсгэдэг салютыг бямба болон ням гарагт тус бүр гурван цагаас хэтрүүлэхгүй ашиглахыг зөвшөөрч, цаашдын эрсдэлийг хязгаарлахаар зорьж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.