Геополитикийн мөргөлдөөн түүхий эдийн үнийг өсгөх эрсдэлтэй байна
Дэлхийн банкны “Түүхий эдийн зах зээлийн төлөв” тайланд дурдсанаар, геополитикийн зөрчил, нийлүүлэлтийн саатал болон цаг уурын хүчин зүйлсийн нөлөөгөөр дэлхийн түүхий эдийн үнэ 2026 онд 23 хувиар өсөх төлөвтэй байна.
Харин 2027 онд долоон хувиар буурахаар тооцоолжээ. Эрчим хүчний үнэ 2026 онд 32 хувиар өсөж, сүүлийн дөрвөн жилийн хамгийн өндөр түвшинд хүрэхээр байна. Тухайлбал, “Brent” маркийн газрын тосны нэг баррелийн үнэ 2025 онд дунджаар 69 ам.доллар байсан бол энэ онд 91 ам.долларт хүрч, 2027 онд 79 ам.доллар болж буурах төлөвтэй байна. Мөн дэлхийн газрын тосны нийлүүлэлт 5.2 хувиар буурахаар байгаа нь сүүлийн 40 жилийн хугацаанд тохиолдсон томоохон уналтуудын нэг болох юм.
Металл, ашигт малтмалын үнэ 25–28 хувиар өсөх төлөвтэй байгаа бөгөөд зэс, хөнгөн цагаан, цагаан тугалганы үнэ дээд түвшинд хүрч болзошгүй байна. Үүнд сэргээгдэх эрчим хүч, цахилгаан автомашин, дата төвүүдийн эрэлт нэмэгдсэнээс гадна нийлүүлэлтийн саатал нөлөөлж байгаа аж. Түүнчлэн алт зэрэг үнэт металлын үнэ 40 хувиар өсөхөөр тооцоолжээ. Хүнсний түүхий эдийн үнэ 2026 онд 10 хувиар өсөх бол 2027 онд дахин долоон хувиар нэмэгдэх төлөвтэй байна.
Мөн бордооны үнэ 14 хувиар өсөх нь хөдөө аж ахуйн үйлдвэрлэлийн зардлыг нэмэгдүүлж, хүнсний хангамжид сөргөөр нөлөөлөх эрсдэлтэй юм. Түүхий эдийн зах зээлд Ойрхи Дорнодын цэргийн мөргөлдөөн, Оросын эрчим хүчний дэд бүтцийн эвдрэл, Хар тэнгисээр үр тариа тээвэрлэх үйл ажиллагааны саатал нөлөөлж байна. Үүнээс гадна хүчтэй Эль-Ниньо үзэгдлийн улмаас ургац буурах эрсдэл нэмэгдэж, тээвэрлэлт болон шатахууны зардал өсөх төлөвтэй байна. Хэрэв нөхцөл байдал улам дордвол газрын тосны үнэ баррель нь 105 ам.долларт хүрч, хүнсний үнэ үндсэн төсөөллөөс 12 хувиар давах эрсдэлтэйг Дэлхийн банк анхааруулжээ. Тус байгууллагын дэд ерөнхий эдийн засагчийн мэдээлснээр, олон төрлийн түүхий эдийн зах зээлд зэрэг үүсэж буй хүндрэл нь дэлхийн инфляц, хүнсний хангамж, эдийн засгийн өсөлтөд сөргөөр нөлөөлөх эрсдэлтэй байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.