Норвегийн хамгийн нууцлаг Женнифер Фэйргэйтийн хэрэг

Норвегийн нийслэл Осло хотын тансаг зэрэглэлийн зочид буудалд 1995 онд амиа алдсан нууцлаг эмэгтэйн жинхэнэ нэр ус болон үхлийн учир шалтгаан 31 гаруй жилийн турш тайлагдаагүй хэвээр байна. "Jennifer Fairgate" хэмээх зохиомол нэрээр бүртгүүлсэн тус эмэгтэйн хэрэг нь Европын түүхэн дэх хамгийн учир битүүлэг хэргүүдийн нэгд тооцогддог бөгөөд одоог хүртэл түүнийг хэн байсныг эцэслэн тогтоосон шинэ баримт нотолгоо гараагүй байна.

Хэргийн он цагийн дарааллыг сөхвөл, залуу эмэгтэй 1995 оны тавдугаар сарын 31-ний үдэш Осло хотын төв дэх "Oslo Plaza" зочид буудалд ирж, 28 давхрын 2805 тоот өрөөнд оржээ. Тэрээр бүртгэлийн хуудсанд өөрийгөө 21 настай гэж тэмдэглэн, Бельгийн Верлен тосгоны бодит бус хаягийг бичсэн төдийгүй өрөөндөө "Lois Fairgate" гэх эрэгтэйтэй хамт байрлана гэж мэдүүлсэн байдаг. Гэвч тухайн үед буудлын ажилтнууд түүнээс ямар ч иргэний үнэмлэх, бичиг баримт эсвэл төлбөрийн баталгаа болох карт шаардалгүй оруулсан нь хожим олон асуулт дагуулсан юм. Түүнийг хамгийн сүүлд зургаадугаар сарын 2-ны үдэш өрөөний үйлчилгээний ажилтан амьд харж, их хэмжээний цайны мөнгө авч байжээ.

Төлбөрийн карт бүртгүүлээгүй шалтгаанаар зургаадугаар сарын 3-ны орой зочид буудлын хамгаалалтын ажилтан Эспен Нэсс 2805 тоот өрөөний хаалгыг тогших агшинд дотроос буун дуу сонсогдсон байна. Үүнээс 15 минутын дараа хамгаалалтын албаны дарга түлхүүрээр өрөөг нээн ороход орон дээр толгойдоо буудуулсан эмэгтэйн цогцос олдсон юм. Тухайн үед өрөө дотроосоо түгжигдсэн, талийгаачийн баруун гарын эрхий хуруу гохон дээр байрласан байсан тул цагдаагийн байгууллага уг хэргийг амиа хорлолт хэмээн үзэж хаасан байдаг.

Гэвч хэргийн газраас илэрсэн бодит баримтууд энгийн амиа хорлолт биш байх өндөр магадлалыг илтгэдэг. Талийгаачийн гарт байсан 9 мм-ийн "Browning" гар бууны цуврал дугаарыг мэргэжлийн түвшинд зориудаар арилгасан байснаас гадна өрөөнөөс 34 ширхэг сум олдсон юм. Түүнчлэн эмэгтэйн өмссөн болон цүнхэндээ авч явсан бүх хувцасны брэнд, угаалгын пайзыг хайчилж авсан, ямар ч түрийвч, бичиг баримт, хувийн ариун цэврийн хэрэгсэл үлдээгээгүй байв. Түүнтэй харилцсан ажилтнуудын мэдээлснээр тэрээр герман болон англи хэлээр ямар ч аялгагүй, цэвэр ярьж байсан бөгөөд сүүлд хийсэн шүдний шинжилгээгээр Герман хавийн Европын бүс нутгийн гаралтай болох нь тогтоогджээ.

Хувийн мэдээллээ бүрэн устгасан нарийн төлөвлөлт, буртгэл дээр дурдагдсан хамтрагч эрэгтэй огт олдоогүй зэрэг учир битүүлэг хүчин зүйлсээс үүдэн түүнийг нууц албаны тагнуулч эсвэл зохион байгуулалттай аллагын золиос болсон гэх таамаглал өнөөг хүртэл голлодог байна.