Батсүмбэр сумын 10 аж ахуйн нэгж ЖДҮХС-ийн зээлийн эхний шатанд тэнцжээ
Жижиг, дунд үйлдвэр, үйлчилгээ эрхлэгчдэд олгох ЖДҮХС-ийн хөнгөлөлттэй зээлийн хүсэлтийг цахим системээр 30 хоногийн хугацаанд хүлээн авсан байна.
Төв аймгаас зээлийн хүсэлт, төсөл ирүүлсэн аж ахуйн нэгжүүдийн материалын бүрдүүлэлтийг эхний шатанд шалгахад нийт 68 төсөл тэнцсэнээс 10 нь Батсүмбэр сумын бичил, жижиг, дунд үйлдвэр эрхлэгчдийн төсөл байжээ.
Батсүмбэр сумын хүн ам албан бус тоогоор 12 мянга гаруйд хүрсэн бөгөөд байнгын бус оршин суугчдыг тооцвол хүн амын тоо үүнээс ч өндөр болохыг тус сумын хоршоо, ЖДҮ хариуцсан мэргэжилтэн С.Хосбаяр хэллээ.
Нийслэл хоттой ойр байршилтай, газар тариалан, аялал жуулчлалын салбар эрчимтэй хөгжиж буй тус суманд жижиг, дунд үйлдвэрлэл өргөжин тэлж байна. Тухайлбал, Улаанбаатар хотын хэрэгцээг хангадаг сүү, сүүн бүтээгдэхүүн, жимс, хүнсний ногоо, малын тэжээл, мах, махан бүтээгдэхүүний үйлдвэрлэл түлхүү хөгжжээ.
ЖДҮГ-аас Батсүмбэр сумаас ЖДҮХС-ийн хөнгөлөлттэй зээл хүсэж, эхний шатанд тэнцсэн 10 аж ахуйн нэгжийн төлөөлөлтэй уулзаж, үйлдвэрлэл, үйл ажиллагаатай нь газар дээр нь танилцлаа. Үйлдвэрлэлээ өргөжүүлэх, ажлын байр нэмэгдүүлэх зорилготой эдгээр аж ахуйн нэгжийн хувьд урт хугацаатай, хүү багатай санхүүжилт нь үйл ажиллагаагаа тогтвортой хөгжүүлэхэд чухал дэмжлэг болж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.