Жолооч нарын хамгийн их осол гаргадаг сар ирж байгааг анхааруулав
Оросын "Росгосстрах" даатгалын компани сүүлийн жилүүдийн албан журмын даатгалын статистик судалгаагаар аравдугаар сар нь жилийн хамгийн осол ихтэй сар болохыг тодорхойлж, жолооч нарт сэрэмжлүүлэг хүргэжээ.
Зуны амралт дуусаж есдүгээр сард хотын хөдөлгөөний ачаалал нэмэгддэг ч зам тээврийн ослын бодит огцом өсөлт чухам аравдугаар сард эхэлдэг байна.
Аравдугаар сард зам тээврийн осол огцом өсдөг гол шалтгаан нь шөнийн цагаар хүйтэрч хөлдөлт үүсэх, өдрийн гэрэлтэй байх хугацаа эрс богиносох болон зам дээр унасан нойтон навч зэрэг нь халтиргаа үүсгэдэгтэй холбоотой аж. Даатгалын нөхөн төлбөрийн үзүүлэлтээс харвал тус сард бүртгэгдсэн ослын хэмжээ өмнөх есдүгээр сартай харьцуулахад 2023 онд 11 хувиар, 2024 онд 8.8 хувиар тус тус өссөн байна.
Зуны сүүл болон намрын эхэн үед замын нөхцөл байдал харьцангуй тогтвортой хадгалагддаг байна. Есдүгээр сарын ослын өсөлт наймдугаар сартай харьцуулахад 2023 онд 4.8 хувь, 2024 онд 2 хувь, 2025 онд 1.7 хувьтай байв. Түүнчлэн наймдугаар сард нөхөн төлбөр шаардсан тохиолдол долоодугаар сарынхаас 2025 онд 7 хувиар, 2026 онд 6 хувиар буурчээ. Үүнээс гадна "АльфаСтрахование" компанийн гаргасан судалгаанд дурдсанаар мөн адил жилийн нийт ослын 9.4 хувь нь аравдугаар сард тохиолддог бөгөөд долоо хоногийн баасан гаргийн осол нийт үзүүлэлтийн 16.3 хувийг бүрдүүлж, хамгийн аюултай өдөрт тооцогддог байна.
Цаг агаарын эрс өөрчлөлт эхлэхээс өмнө өвлийн дугуйгаа шалгаж бэлтгэх, элэгдсэн шил арчигчийг солихыг мэргэжилтнүүд зөвлөж байна. Түүнчлэн хаалганы түгжээ болон жийргэвч резинийг хөлдөхөөс сэргийлж хамгаалах, хүйтний улиралд тохиромжтой зуурамтгай чанар багатай хөдөлгүүрийн тосоор солих шаардлагатайг санууллаа.
Намрын хүйтрэлт эхэлж, замын нөхцөл байдал огцом өөрчлөгдөх эрсдэлтэй энэ үед техникийн бүрэн бүтэн байдлыг урьдчилан хангах нь жолооч нарын аюулгүй байдлын гол баталгаа болно. Тээврийн хэрэгслийн өвлийн бэлтгэлийг цаг тухайд нь базааж, цаг агаарын нөхцөлд тохируулан анхаарал болгоомжтой зорчих нь зам тээврийн болзошгүй ослоос сэргийлэх ач холбогдолтой юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.