Гурван хүүхдийнхээ амийг бүрэлгэсэн Линдси Клэнсигийн шүүх хурал мухардалд оров
АНУ-ын Массачусетс мужид гурван бага насны хүүхдийнхээ амийг хохироосон сувилагч асан Линдси Клэнсид холбогдох шүүх хурал тангарагтны шүүгчид нэгдсэн шийдвэрт хүрч чадаагүйн улмаас мухардалд орлоо.
Плимут хотын Дээд шүүхэд таван долоо хоногийн турш үргэлжилсэн тус шүүх хурал нь төрсний дараах сэтгэцийн эмгэг, эрүүл мэндийн тусламж үйлчилгээ болон эрүүгийн хариуцлагын талаарх дэлхий нийтийн маргааныг дахин сэдрээлээ. Долоон өдрийн турш, бараг 38 цаг зөвлөлдсөн 12 тангарагтны шүүгч санал зөрөлдсөнөөр 2026 оны есдүгээр сарын 4-ний баасан гаргийн хуралдаанаар шүүх ажиллагааг хүчингүйд тооцохоос өөр аргагүйд хүрчээ.
Хэргийн түүхийг сөхвөл, 2023 оны нэгдүгээр сарын 24-ний өдөр амаржих газрын сувилагчаар ажиллаж байсан 36 настай Линдси Клэнси Даксбери дэх гэртээ өөрийн гурван хүүхэд болох 5 настай Кора, 3 настай Доусон, 8 сартай Каллан нарыг боомилж амийг нь хохироосон байна. Үүний дараа тэрбээр бугуй болон хүзүүгээ зүсэж, байшингийнхаа хоёр давхрын цонхоор үсрэн амиа хорлохыг завджээ. Тэрбээр амьд үлдсэн ч бэлхүүснээс доош мэдээгүй болж, тэргэнцэр дээр амьдрах болсон юм.
Клэнсиг нэгдүгээр зэргийн хүн амины хэрэгт буруутган, шүүх хурал 2026 оны долоодугаар сарын 20-нд эхэлсэн бөгөөд тэрбээр хүүхдүүдээ хөнөөсөн гэдгээ үгүйсгээгүй ч сэтгэцийн өвчний улмаас хэрэг хүлээх чадваргүй хэмээн өөрийгөө хамгаалж байв.
Тангарагтны шүүхийн шийдвэр гарах шатанд есөн эмэгтэй, гурван эрэгтэйгээс бүрдсэн шүүгчдийн дунд 11-ийг харьцах нь 1 гэсэн харьцаатай санал хуваагджээ.
Арван нэгэн шүүгч Клэнсиг хэрэг үйлдэх үедээ сэтгэцийн хүнд байдалд байсан тул эрүүгийн хариуцлага хүлээх чадваргүй гэж үзсэн бол ганцхан шүүгч үүнийг эсэргүүцсэн байна. Шүүгчдийн ахлагч тухайн ганц шүүгчийг шүүгчийн зааварчилгааг дагахаас татгалзаж байна хэмээн мэдэгдэж, түүнийг бүрэлдэхүүнээс хасахыг өмгөөлөгч Кевин Реддингтон хүссэн боловч шүүгч Уильям Ф.Салливан татгалзжээ. Эцэст нь тангарагтны шүүх нэгдсэн шийдвэрт хүрч чадахгүй болсноо албан ёсоор мэдэгдсэнээр шүүх хурал хүчингүй болсон байна.
Энэхүү хэрэг нь Америкийн нийгмийг Клэнсиг эрүүл мэндийн тогтолцооны хохирогч уу, эсвэл хүйтэн цуст гэмт хэрэгтэн үү гэдгээр нь хоёр талцуулаад байна.
Өмгөөлөгчдийн зүгээс түүнийг төрсний дараах сэтгэцийн хүнд эмгэг, хоёр туйлт эмгэг болон хэт их эмийн нөлөөнд автсан хохирогч гэж тайлбарлажээ. Шүүх хуралд гэрчээр оролцсон сэтгэцийн эмч Филип Резник Клэнсиг хэрэг гарах өдөр сэтгэцийн цочролд орж, хүүхдүүдээ болон өөрийгөө хөнөөхийг тушаасан хий үзэгдэл сонссон хэмээн мэдүүлсэн байна. Харин прокурорын зүгээс түүнийг нөхрөө гэрээсээ гарах хооронд хүүхдүүдээ боомилох цаг хугацааг нарийн тооцож, төлөвлөгөөтэй ажилласан хэмээн буруутгаж байгаа юм. Плимут тойргийн прокурор Тим Круз гэмт хэрэгтнүүдийг хохирогч мэт үзэж, жинхэнэ хохирогчдыг орхигдуулж байгаад харамсаж буйгаа илэрхийлжээ.
Одоогоор Линдси Клэнси сэтгэцийн эмнэлэгт цагдан хоригдож байгаа бөгөөд шүүх хуралдаан 2026 оны есдүгээр сарын 29-нд дахин товлогджээ. Түүний өмгөөлөгч нь шүүгчээс цагаатгах шийдвэр гаргахыг хүсэж байгаа ч хуулийн мэргэжилтнүүд үүнийг бүтэх магадлал багатай гэж үзэж байна. Цаашид хэргийг дахин шүүх, эсвэл хөнгөн ял оноох хэлэлцээр хийх эсэхийг прокурор Тим Круз шийдэх бөгөөд хэрэв дахин шүүхээр болбол тангарагтны шүүгчдийг шинээр сонгох үйл явц эхнээсээ явагдах юм.
Эх сурвалж:
•
• whqr.org
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.