Кино найруулагч Жорж Лукас тэрбум доллараар музей байгуулжээ
"Оддын дайн" киноны алдарт найруулагч Жорж Лукасын санаачлан байгуулсан "Лукасын Хүүрнэх урлагийн музей" 16 жилийн урт хугацааны аялал, нөр их хөдөлмөрийн үр дүнд 2026 оны есдүгээр сарын 22-ны мягмар гаргийн өдөр Лос-Анжелес хотноо албан ёсоор үүд хаалгаа нээхээр боллоо.
Нийт нэг тэрбум орчим ам.долларын өртөгтэй, гурван өөр хотыг дамжин байгуулагдсан уг музейн хэвлэлийн урьдчилсан танилцуулга есдүгээр сарын эхээр болсон бөгөөд үүсгэн байгуулагч Жорж Лукас болон түүний эхнэр, бизнес эрхлэгч Меллоди Хобсон нар энэхүү түүхэн бүтээн байгуулалтыг олон нийтэд танилцуулсан юм. Нээлтийн үеэр Жорж Лукас сэтгэл хөдлөлөө барьж ядан үг хэлэхдээ, уг асар том төсөл нь түүний хүсэл зоригийг бараг л мохоож, туйлдуулж орхисон хэмээн нуулгүй хуваалцжээ.
Музейн барилгын архитектурыг "MAD Architects" компанийн Ма Янсон болон гүйцэтгэх архитектор "Stantec" хамтран сансрын хөлөг мэт өвөрмөц хэлбэртэйгээр бүтээжээ. Нийт 300 мянган хавтгай дөрвөлжин фут талбай бүхий уг байгууламжийн гадна талыг шилээр хүчитгэсэн полимер материалаар хийсэн, дунджаар 8х32 футын хэмжээтэй 1271 ширхэг муруй цагаан хавтангаар бүрсэн байна. Түүхэн Экспозишн паркт, Жорж Лукасын төгссөн Өмнөд Калифорнийн их сургуулийн ойролцоо байрлах тус музей нь 11-13 акр талбай бүхий кампустай. Ландшафтын архитектор Миа Лерерийн удирдсан "Studio-MLA" баг 700 орчим мод, толгод бүхий шинэ цэцэрлэгт хүрээлэнг төлөвлөж, Өмнөд Лос-Анжелесийн оршин суугчдад зориулсан ногоон байгууламжийг бий болгожээ.
Хүн төрөлхтөнийг холбож, итгэл үнэмшлийг бүрдүүлдэг түүх өгүүлэх, соёлыг алдаршуулах зорилготой Хүүрнэхт урлагийн музей нь дотроо 30 гаруй галерей бүхий 100 мянга гаруй хавтгай дөрвөлжин фут үзэсгэлэнгийн талбайтай. Энд дүрслэх урлаг, зурагт чимэглэл, кино урлагийг уран зураг, барималтай адил түвшинд авч үзэж буйгаараа онцлог юм. Музейн сан хөмрөгт 40 мянга гаруй бүтээл хадгалагдаж байгаагаас анхны нээлтийн үзэсгэлэнд 1300 гаруй ховор үзмэрийг дэлгэн үзүүлнэ.
Үзмэрүүдийн дунд балар эртний хадны сүг зургаас эхлээд 20-р зууны Америкийн урлагийн сор бүтээлүүд багтсан бөгөөд Норман Роквелл, Фрида Кало, Артемисиа Жентелески, Бэнкси, Фрэнк Фразетта, Диего Ривера, Жуди Бака зэрэг алдартай уран бүтээлчдийн бүтээлүүд багтжээ.
Кино сонирхогчдын хувьд уг музей нь жинхэнэ эрдэнэсийн сан болох юм.
Энд Жорж Лукасын 1971-2012 оны хоорондох хувийн архивыг бүрэн эхээр нь байрлуулсан байна. Үзмэрүүдийн дунд "Оддын дайн" киноны анхны R2-D2 робот, бодит хэмжээтэй Набүү сөнөөгч хөлөг, мөн "Оз орны шидтэн" киноны Хулчгар арслангийн өмсгөл зэрэг кино урлагийн түүхэн ховор нандин зүйлс багтжээ. Үүнээс гадна музейн цогцолборт үнэ төлбөргүй ажиллах Судалгааны номын сан, хоёр театр, бэлэг дурсгалын дэлгүүр, кафе болон "Skywalker Grill" нэртэй зоогийн газар үйл ажиллагаа явуулна.
Музейн нээлтийн үзэсгэлэнд зориулж "TASCHEN" хэвлэлийн газартай хамтран дүрслэх урлагийн түүхийг өгүүлсэн хоёр боть номыг 2026 оны наймдугаар сарын 27-нд худалдаанд гаргажээ. Уг бүтээлд Жорж Лукас болон нэрт найруулагч Гильермо дель Торо нарын бичсэн тайлбар, эссэ багтсан байна. Ийнхүү олон жилийн турш хүлээгдсэн Лукасын музей нь зөвхөн уран зургийн цуглуулга төдийгүй хүн төрөлхтний түүх өгүүлэх соёлын өвийг хойч үедээ өвлүүлэн үлдээх соёл урлагийн томоохон төв болон хөгжих ирээдүйтэй юм.
Эх сурвалж:
•
•
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.