АНУ-д хөгжлийн бэрхшээлтэй өндөр настан гэртээ баавгайд бариулж амиа алджээ
АНУ-ын Нью-Мексико мужийн Кристал тосгонд хөгжлийн бэрхшээлтэй, 67 настай өндөр настан гэртээ баавгайн дайралтад өртөж, харамсалтайгаар амиа алдсан хэрэг гарчээ.
Саяхан тархины цус харвалт өгсний улмаас тэргэнцэр болон тулгууртай алхдаг байсан Бенджамин Галона гэх эрэгтэй ийнхүү зэрлэг амьтны халдлагад өртсөн бөгөөд уг эмгэнэлт явдлын талаарх албан ёсны мэдээллийг түүний ар гэрийнхэн олон нийтэд мэдээлсэн байна.
Хэрэг явдал болох үеэр Бенджамин Галона гэртээ ганцаараа байсан бөгөөд хүү нь шуудангийн салбар руу явсан байжээ. Хэргийн нөхцөл байдлыг шинжлэн үзэхэд, хохирогч өндөр настан гаднаас хүүгээ ирлээ хэмээн андуурч, хаалгаа өөрөө нээж өгсөн байх магадлалтай гэж таамаглаж байна. Хүү нь шуудангаас буцаж ирэхэд байшингийнх нь хаалга хагас онгорхой, дотор нь баавгай байжээ. Тэрбээр өөрийн өрөө рүү гүйн орж, хаалгаа тавилгаар хааж бэхлэн, цагдаагийн газарт дуудлага өгсөн байна.
Энэ үеэр хохирогчийн эгч болон зээ охин нь байшингийн гадна автомашинтайгаа ирж, чангаар дуут дохио өгч эхэлсэн нь араатныг үргээн гэрээс гаргахад нөлөөлжээ.
Хэргийн газарт цагдаагийн ажилтнууд ирэхэд Бенджамин Галона амь насанд нь аюултай хүнд гэмтэл авсны улмаас аль хэдийн нас барсан байв. Хууль сахиулагчид халдлага үйлдсэн түрэмгий баавгайг мөрдөн мөшгиж, улмаар устгасан байна.
Зэрлэг амьтад суурьшлын бүс рүү нэвтэрч, хүний амь насанд заналхийлэх тохиолдол сүүлийн үед нэмэгдэж байгаад орон нутгийн эрх баригчид анхаарал хандуулж байна. Тухайлбал, АНУ-ын Колорадо мужийн Эстес-Парк хотод баавгай цонхоор нэвтэрч, 80 настай эмэгтэй рүү халдсан хэрэг гарсан бөгөөд хохирогч хэвлийн хэсэгтээ хүнд гэмтэл авч амьд үлджээ. Мөн Арканзас мужид трактор дээрээ ажиллаж байсан 72 настай иргэн баавгайн дайралтад өртөж, биеийн байдал нь маш хүнд байгааг албаныхан мэдээлсэн байна.
Эх сурвалж:
• news.ru
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.