Гахайн бөөрийг хүнд шилжүүлэн суулгах туршилт түүхэн амжилт тогтоолоо
АНУ-ын Массачусетс мужийн нэгдсэн эмнэлгийн эмч нар генийн өөрчлөлттэй гахайн бөөрийг хүнд түр хугацаанд шилжүүлэн суулгаж, улмаар хүний бөөр шилжүүлэн суулгах хүртэлх хугацаанд амжилттай "гүүр" болгон ашигласан дэлхийн анхны тохиолдлыг бүртгэлээ. "The Lancet" анагаах ухааны сэтгүүлд нийтлэгдсэн судалгаагаар, бөөрний дутагдалтай өвчтөн генийн өөрчлөлттэй гахайн бөөрний тусламжтайгаар диализийн аппаратаас бүрэн хамааралгүйгээр 271 хоногийн турш амьдарч, дээд амжилт тогтоосон байна.
Уг ололт амжилт нь эрхтэний дутагдалд орсон сая сая хүмүүст амьдрал бэлэглэх шинэ боломжийг нээж байгаа юм.
Нью-Хэмпшир мужийн Конкорд хотын оршин суугч, өдгөө 66 настай тэтгэвэрт гарсан инженер Тим Эндрюс чихрийн шижингийн хоёрдугаар хэлбэрээс үүдэлтэй бөөрний эцсийн шатны дутагдалд орсон байжээ. Түүний цусны бүлэг ховор тул ойрын таван жилийн хугацаанд тохирох хүний бөөр олдох магадлал ердөө есөн хувьтай байсан бөгөөд хүлээх хугацаандаа нас барах, эсвэл жагсаалтаас хасагдах эрсдэл 40 гаруй хувьтай байв. Гэвч гахайн бөөр шилжүүлэн суулгуулснаар тэрбээр есөн сарын турш диализийн эмчилгээгүйгээр хоол хийх, гэрээ цэвэрлэх, нохойгоо салхилуулах зэргээр энгийн амьдралдаа эргэн орж, бүр зургаадугаар сард "Бостон Ред Сокс" бейсболын тэмцээний нээлтийн анхны шидэлтийг хүртэл хийжээ.
Мэс засалд ашигласан бөөрийг Массачусетс мужийн "eGenesis" биотехнологийн компанийн үржүүлсэн "Вилма" нэртэй Юкатан одой гахайнаас авсан байна. Эрдэмтэд "CRISPR" генийн хайчны технологийг ашиглан гахайн геномд 69 удаагийн өөрчлөлт оруулжээ. Ингэхдээ хүний дархлааны системээс татгалзах урвал үүсгэдэг гахайн ген болон чихрийн молекулуудыг устгаж, нийцтэй байдлыг сайжруулах хүний генийг нэмсэн байна. Мөн амьтнаас хүнд вирус халдах эрсдэлээс сэргийлж, гахайн дотоод ретровирусуудыг бүрэн устгасан нь мэс заслыг аюулгүй болгоход шийдвэрлэх нөлөө үзүүлсэн гэж үзэж байна.
Массачусетс мужийн нэгдсэн эмнэлгийн мэс засалчид 2025 оны нэгдүгээр сарын 25-ны өдөр хоёр цаг хагас үргэлжилсэн хагалгааг амжилттай хийжээ.
Үүнээс хойш 271 хоногийн турш гахайн бөөр хэвийн ажиллаж байгаад 2025 оны аравдугаар сарын 23-наас үйл ажиллагаа нь суларч эхэлсэн тул эмч нар бөөрийг аюулгүйгээр авч, өвчтөнийг түр хугацаанд диализийн аппаратад шилжүүлсэн байна. Улмаар 2026 оны нэгдүгээр сард Тим Эндрюс нас барсан донороос хүний бөөр хүлээн авснаар амьтны эрхтэнээс хүний эрхтэн рүү шилжсэн дэлхийн анхны өвчтөн болсон юм.
Судалгааны багийн ахлагч, доктор Леонардо Riella уг туршилт нь амьтны эрхтэн шилжүүлэн суулгах аргачлал нь хүний эрхтэн олдох хүртэл өвчтөнийг эрүүл, диализгүй байлгах маш үр дүнтэй "түр зуурын гүүр" эмчилгээ болж чадахыг нотоллоо хэмээн онцолжээ. Түүнчлэн Тим Эндрюсийн биеэс амьтны гаралтай ямар нэгэн вирус илрээгүй нь аюулгүй байдлын том баталгаа болов. Уг амжилт нь өмнөх ижил төрлийн туршилтуудын хугацааг хол давсан бөгөөд өмнө нь гахайн бөөр суулгуулсан өвчтөнүүд 52 болон 130 хоногийн дараа нас барж, эсвэл эрхтэн нь "зөрчилдөж" байсан түүхтэй аж.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.