Р.Булгамаа: 10 настай хүүхдийн амь насыг хохиосон хэрэгт гурван иргэнийг цагдан хорьж, хэргийг хүндрүүлэх нөхцөл байдалтайгаар шалгаж байна

Ховд аймагт хөрш айлынхаа тарвас хураах ажилд яваад 10 настай А.А охин амь насаа алдсан харамсалтай хэргийн мөрдөн шалгах ажиллагааны явц болон ард нь үлдсэн гэр бүлийн нийгмийн асуудлын талаар өмгөөлөгч Р.Булгамаа мэдээлэл өглөө.

Өмгөөлөгч Р.Булгамаа: 

-Өнөөдөр 10 настай хүүхдийн амь хохирсон үйл баримтыг Эрүүгийн хуулийн тусгай ангийн 10.1-д заасан "Хүнийг алах" гэмт хэргийг бүлэглэж үйлдсэн гэх үндэслэлээр яллагдагчаар татаж, гурван иргэнийг цагдан хориод байна. Анх хүнийг алах гэмт хэргээр яллагдагчаар татсан бөгөөд хэргийн зүйлчлэлийн тухайд хэд хэдэн хүндрүүлэх нөхцөл байдлыг тусган шалгаж байгаа.

Үүнд, нэгдүгээрт, биеэ хамгаалах чадваргүй бага насны хүүхдийг бүлэглэж, онц хэрцгий аргаар амь насыг нь бүрэлгэсэн нөхцөл байдал тогтоогдсон. Мөрдөн шалгах ажиллагаа явуулж буй эрх бүхий байгууллагын ажлын хэсэг цагдан хоригдож буй гурван иргэний үйлдэл, оролцоо ямар байсан, ямар санаа зорилгоор энэ гэмт хэргийг үйлдсэн болон яагаад ийм нөхцөл байдал үүсэх болов гэдгийг олон талаас нь хөтөлбөргүй тогтоохоор ажиллаж байгаа учраас, хугацаа шаардагдаж байгаа. 

Мөн хохирогчийн гэр бүлийн хүсэлтээр хууль ёсны эрхийг нь хамгаалж буй өмгөөлөгчийн хувьд нийслэлийн Засаг даргад хандан хүсэлт гаргамаар байна. Нийслэлд зорилтот бүлгийн иргэдэд зориулсан түрээсийн байрны хөтөлбөр хэрэгждэг. Тухайн гэр бүл, үр хүүхдүүдийг нь түр хугацаанд ч болов орон байраар хангаж, хүүхдүүдийг сургууль соёлтой болгох асуудлыг төрөөс анхаарах шаардлагатай. Энэ асуудлыг ингээд орхиж болохгүй тул хүүхдийн байгууллага болон Хотын даргад албан ёсоор хандана. 

Зөвхөн мэдүүлэг өгснөөр энэ асуудал шийдэгдэхгүй, маш их ажиллагаа хийгдэх учраас багагүй хугацаа орно. 10 настай хүүхдийн аминд хүрсэн, одоо цагдан хоригдож байгаа гурван иргэний онц хэрцгий аргаар үйлдсэн энэ гэмт хэрэгт үйлдэл, оролцоо нь ямар байсан, сэдэл санаа зорилго нь юу байв, яагаад үйлдсэн хэргээ нуун дарагдуулах болсон бэ зэрэг олон хүнд нөхцөл байдлуудыг тогтоох шаардлагатай учраас багагүй хугацаа орно. Бид ард нь үлдсэн үр хүүхдүүд, гэр бүлийн нийгмийн асуудлыг бас хүмүүнлэг ёсны үүднээс, хүүхдийн эрхийн үүднээс анхаарахгүй байхын аргагүй байна гэв.