Эхнэрээ мансууруулж, бусдад хүчирхийлүүлсэн нөхрийн шүүх хурал Их Британид эхэллээ
Их Британийн Манчестер хотын Миншулл гудамжны Эрүүгийн хэргийн шүүхэд эхнэрээ 20 жилийн турш мансууруулж, бусад эрчүүдэд хүчирхийлүүлэх хуйвалдаан зохион байгуулсан нөхөр болон түүний хамсаатнуудад холбогдох шүүх хурал эхэллээ.
Стокпорт хотоос гаралтай, 60 гаруй насны шүүгдэгч нь 2004 оноос хойш эхнэрээ ухаангүй байх хугацаанд нь бэлгийн хүчирхийлэлд өртүүлж байсан бөгөөд түүнд нийт 48 эрүүгийн хэрэг үүсгэсэн байна. Хохирогч эмэгтэйн нэр төрийг хамгаалах хуулийн дагуу шүүгдэгч нөхрийн нэрийг олон нийтэд мэдээлэхийг хоригложээ.
Шүүгдэгч нөхөр эхэндээ бүх хэргээ үгүйсгэж байсан ч 2026 оны зургаадугаар сард 15 үйлдлээ хүлээн зөвшөөрсөн байна. Үүнд таван удаагийн хүчингийн хэрэг, бэлгийн дарамт учруулсан гурван үйлдэл, бэлгийн хүчирхийллийн зургаан тохиолдол, мөн эхнэрийнхээ зөвшөөрөлгүйгээр дотно харилцааны зураг, бичлэгийг бусдад тараасан нэг хэрэг багтжээ. Харин тэрбээр үлдсэн 33 хэргийг, түүний дотор хүчингийн 11 үйлдэл, хүчирхийлэхээр хуйвалдсан болон хохирогчийг биеэ хамгаалах чадваргүй болгох зорилгоор мансууруулах бодис хэрэглэсэн гэх буруутгалыг үгүйсгэсээр байна.
Уг хэрэгт нөхрөөс гадна 28-73 насны 12 эрэгтэй хамтран шүүгдэж байгаа юм. Тэднийг бэлгийн хүчирхийлэлд шууд оролцсон, мансууруулах бодис өгөхөд тусалсан, мөн цахим орчинд бэлгийн хүчирхийллийг өдөөн турхирсан зэрэг хэргээр буруутгаж байна. Шүүгдэгчдийн дунд эмнэлгийн ажилтан, таксины жолооч, хөлбөмбөгийн дасгалжуулагч асан хүмүүс байгаа бөгөөд "Таунтон Таун" хөлбөмбөгийн клубийн гүйцэтгэх захирлын албан тушаалаас огцорсон 55 настай Карл Линдсей, 59 настай Дэвид Грэйвс, 42 настай Даниэль Рэйнер нар багтжээ. Одоогоор таван шүүгдэгчийг батлан даалтад гаргаж, бусдыг нь цагдан хорьж байна.
Хэрэгт холбогдсон 13 дахь этгээд болох Шотландын Данди хотын их сургуулийн техникч, 59 настай Кит Фотерингем хэргээ хүлээсэн тул одоогоор ял сонсохоо хүлээж байгаа аж. Тэрбээр бэлгийн хүчирхийлэл үйлдэхээр хуйвалдсан, хүчирхийлэлд оролцсон, мөн хохирогчийг мансууруулах бодис ашиглан биеэ хамгаалах чадваргүй болгохоор тохиролцсон гэм буруугаа хүлээжээ.
Олон улсын хэвлэл мэдээллийн хэрэгслүүд тус хэргийг 2024 онд Францад болсон Жизель Пеликогийн дуулиант хэрэгтэй зүйрлэж байна.
Францын хэрэгт нөхөр Доминик Пелико нь эхнэрээ олон жилийн турш мансууруулж, олон арван эрчүүдийг хөлслөн хүчирхийлүүлдэг байсан бөгөөд хохирогч эмэгтэй өөрийн нэрээ нууцлах эрхээсээ татгалзаж, хэргийг ил тод шийдвэрлүүлж байсан юм. Уг шүүх хурал нь бэлгийн хүчирхийлэл, гэр бүлийн хүрээний ноцтой гэмт хэрэгтэй тэмцэхэд чухал ач холбогдолтойд тооцогдож байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.