Дуэйн Дэвисийг Тупак Шакурын амийг хөнөөсөн гэж шүүх үзлээ
АНУ-ын Лас-Вегас хотын шүүхээс 1996 оны есдүгээр сард нэрт реппер Тупак Шакурын амийг хөнөөсөн хэрэгт Комптон хотын бүлэглэлийн удирдагч асан, өдгөө 63 настай Дуэйн "Кеффи Ди" Дэвисийг буруутай гэж үзлээ.
Хоёр долоо хоног үргэлжилсэн шүүх хурлын дараа тангарагтны шүүх гурван цаг хүрэхгүй хугацаанд зөвлөлдөж, түүнийг зэвсэг ашиглан хүний амь насыг бүрэлгэсэн хэрэгт буруутай хэмээн шийдвэрлэсэн байна. Энэхүү шийдвэр нь дэлхий нийтийн анхаарлыг бараг 30 жилийн турш татсаар ирсэн нууцлаг хэргийг шийдвэрлэхэд түүхэн алхам боллоо.
Шүүх хурлын явцад прокурорууд Дуэйн Дэвисийг уг аллагыг газар дээр нь удирдан зохион байгуулж, тушаал өгсөн гол буруутан гэж тодорхойлсон байна. Хэдийгээр Дэвис өөрөө гох дараагүй ч Невада мужийн хуулиар аллага үйлдэхэд тусалсан, дэмжсэн эсвэл зохион байгуулсан хэн ч адил хэмжээний хариуцлага хүлээдэг. Прокурорын тал Дэвисийн өмнө нь өгч байсан мэдүүлгүүд, цагдаагийнханд өгсөн ярилцлага болон 2019 онд гаргасан "Compton Street Legend" дурсамж номондоо бичсэн хэргээ хүлээсэн баримтуудыг гол нотолгоо болгон ашигласан байна. Тэрээр тухайн үед буун дуу гарсан Кадиллак машин дотор байсан дөрвөн хүнээс өнөөдөр амьд үлдсэн цорын ганц хүн юм.
Нөгөө талаас өмгөөлөгч нь үйлчлүүлэгчээ хамгаалж,
Дэвисийн өмнөх мэдүүлгүүд болон дурсамж ном нь санхүүгийн ашиг олох зорилгоор хэтрүүлэн зохиосон зохиол байсан гэж маргажээ. Мөн тэрээр хэргийн газарт Дэвис байсныг, эсвэл Кадиллак машин дотор сууж явсныг батлах утасны бичлэг, хяналтын камерын дүрс зэрэг ямар ч бодит биет нотлох баримт байхгүй байгааг шүүх бүрэлдэхүүнд сануулсан байна. Гэвч шүүх бүрэлдэхүүн өмгөөлөгчийн энэхүү тайлбарыг няцааж, шүүгдэгчийг буруутай гэж үзсэн юм.
Уг хэрэг нь Дэвисийн удирддаг "South Side Compton Crips" болон "Mob Piru" бүлэглэлүүдийн хоорондын ширүүн тэмцлээс үүдэлтэй байжээ.
Хэрэг гардаг өдөр буюу 1996 оны есдүгээр сарын 7-нд Майк Тайсоны боксын тэмцээний дараа Тупак Шакур болон түүний хамтрагчид Дэвисийн зээ дүү Орландо "Бэйби Лэйн" Андерсоныг зодсон байна. Үүний хариуд Дэвис өшөө авахаар шийдэж, буу зэвсэг бэлтгэн, Кадиллак машинтай Шакурыг хайж эхэлжээ. Тэд Лас-Вегас Стрип орчимд Шакурын сууж явсан БМВ машинтай зэрэгцэн ирж, гал нээснээр реппер олон удаа буудуулж, зургаан хоногийн дараа эмнэлэгт нас барсан юм.
Шүүхийн шийдвэр уншиж сонсгох үед Тупак Шакурын дүү Секива "Сэт" Шакур нулимс дуслуулан, прокуроруудад талархал илэрхийлсэн бол түүний үеэл Зайд Акиньела "Бид гашуудаж чадахгүй 30 жилийг хүлээлээ" хэмээн сэтгэгдлээ хуваалцжээ.
Харин шүүгдэгч Дэвис шүүхийн шийдвэрийг тайван хүлээн авсан бөгөөд түүний хүү шүүхийн танхимд нүүрээ даран сууж байв. Бүх насаараа хоригдох ял авч магадгүй байгаа Дэвис шүүхийн шийдвэрийг давж заалдахаа мэдэгдсэн бөгөөд прокурорууд гэрчүүдийн зохион байгуулалттай холбоотойгоор бүлэглэлийн хэргийг хүндрүүлэх заалтыг хэрэгсэхгүй болгохоор шийдвэрлэсэн байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.