Берлин хотын захиргааг хакерууд сүрдүүлж, 2 сая евро нэхжээ
Хакеруудын бүлэг Берлин хотын захиргааны сүлжээнд кибер халдлага үйлдэж, их хэмжээний барьцаа нэхсэн ч хотын удирдлагууд үүнээс эрс татгалзсан тухай тус хотын Захирагч Кай Вегнер албан ёсоор мэдэгдлээ.
Халдлага үйлдсэн этгээдүүд хотын захиргаанаас 30 биткоин буюу ойролцоогоор 2 сая евро (2.3-аас 2.5 сая ам.доллар)-г нэхсэн байна. Берлин хотын захиргаа сүрдүүлэгт автахгүй бөгөөд барьцааны мөнгийг төлөхгүй гэдгээ хатуу илэрхийлэв.
Энэхүү халдлагыг Орос болон Зүүн Европын орнуудаас гаралтай гэж үздэг "Rhysida" хэмээх ransomware буюу барьцаалагч програмын бүлэг үйлдсэнээ хүлээжээ. Тэд хулгайлсан мэдээллээ 2026 оны наймдугаар сарын 28-ны баасан гаргийн өдөр өөрсдийн "Tor" сүлжээн дэх цахим хуудсандаа байршуулж, нэг долоо хоногийн хугацаатай тулган шаардлага тавьсан байна. Хэрэв заасан хугацаанд барьцааны мөнгийг төлөхгүй бол хулгайлсан өгөгдлийг дуудлага худалдаагаар зарах, эсвэл нийтэд ил болгоно гэж сүрдүүлжээ.
Халдлагын явцыг авч үзвэл, хакерууд 2026 оны наймдугаар сарын 7-ноос 12-ны хооронд Берлин хотын Хөдөлгөөнт байдал, тээвэр, уур амьсгалын хамгаалалт, байгаль орчны сенатын газрын системээс мэдээллийг нууцаар хуулбарлан авчээ.
Үүнийг наймдугаар сарын 14-ний өдөр илрүүлж, аюулгүй байдлыг хангах үүднээс Хөдөлгөөнт байдал, тээвэр, уур амьсгалын хамгаалалт, байгаль орчны сенатын газар болон Хот байгуулалт, барилга, орон сууцны сенатын газрын сүлжээний холболтыг яаралтай салгасан байна. Сүлжээний системийг наймдугаар сарын сүүлээр эргүүлэн хэвийн ажиллагаанд оруулсан бөгөөд эхэндээ "нууц мэдээлэл алдагдаагүй" гэж мэдээлж байсан ч наймдугаар сарын 26-нд хувийн болон албаны бус мэдээллүүд алдагдсан байж болзошгүйг хүлээн зөвшөөрчээ. Үүний дараа буюу наймдугаар сарын 27-ны пүрэв гаргийн орой хотын захиргаанд барьцааны албан ёсны шаардлага ирсэн байна.
Одоогоор нарийвчилсан шалгалт үргэлжилж байгаа бөгөөд хакеруудын бүлэг нийт 5.79 терабайт (ТБ) хэмжээтэй өгөгдлийг хуулбарлан авсан гэж мэдэгдэж байна. Үүнд 12,076 иргэний хувийн мэдээлэл, 16,000 гаруй цахим шуудангийн хаяг, 12,000 орчим утасны дугаар багтжээ. Түүнчлэн 46,500 орчим гэрээ, санхүүгийн болон хүний нөөцийн баримт бичиг, захиргааны торгуулийн 80,000 орчим шийдвэр, нууц үгнүүд, шүүхийн хэрэг хянан шийдвэрлэх ажиллагааны материалууд болон онцгой байдлын үеийн төлөвлөгөөнүүд алдагдсан байх эрсдэлтэй байна.
Сүлжээг түр хугацаанд салгасан нь иргэдэд үзүүлэх төрийн үйлчилгээнд шууд нөлөөлж, орон сууцны тэтгэмж хүсэх болон түүнтэй холбоотой төлбөр тооцоог боловсруулах ажил хэд хоногоор саатжээ. Мөн 2026 оны есдүгээр сарын 20-ны өдөр болох Берлин хотын орон нутгийн сонгуулийн аюулгүй байдалд иргэд санаа зовж байсан юм. Гэвч Берлин хотын Дотоод хэргийн сенатч бөгөөд Орлогч дарга Ирис Спрангер сонгуулийн систем нь техникийн хувьд бүрэн тусгаарлагдсан бөгөөд сонгуультай холбоотой ямар нэгэн мэдээлэл алдагдаагүй тул санал хураалт зуун хувь аюулгүй явагдана гэдгийг батлан мэдэгдэв.
Одоогоор мэдээлэл, харилцаа холбооны технологийн шуурхай хариу арга хэмжээ авах баг идэвхтэй ажиллаж байна. Берлин мужийн Эрүүгийн цагдаагийн газар (LKA), прокурорын газар болон Холбооны мэдээллийн аюулгүй байдлын газар зэрэг ХБНГУ-ын аюулгүй байдлын байгууллагууд хамтран уг хэргийг нэн яаралтай горимоор шалгаж эхэлжээ. Энэхүү үйл явдал нь төрийн байгууллагуудын кибер аюулгүй байдлыг бэхжүүлэх, цаашид ийм төрлийн халдлагаас урьдчилан сэргийлэх тогтолцоог сайжруулах шаардлагатайг харуулж байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.