Ираны Дээд удирдагч Можтаба Хаменеи зургаан сарын турш олны өмнө гарсангүй
АНУ, Израилын Иранд хийсэн цохилтоор дайн эхэлснээс хойш зургаан сар өнгөрөхөд Ираны Дээд удирдагч Можтаба Хаменеи олон нийтийн өмнө гараагүй хэвээр байна.
Можтаба Хаменеи 2026 оны хоёрдугаар сарын 28-нд АНУ, Израилын цохилтын үеэр амиа алдсан эцэг Али Хаменеигийн оронд гуравдугаар сард Ираны Дээд удирдагчаар сонгогдсон.
Тэрээр уг цохилтын үеэр хүнд шархадсан гэх мэдээлэл бий. Шинэ албан тушаалдаа очсоноос хойш Можтаба Хаменеи олон нийтэд өөрийн биеэр мэдэгдэл хийгээгүй юм.
Түүний мэдэгдлүүдийг Ираны төрийн хэвлэлүүд бичгээр дамжуулан хүргэж байгаа билээ. Тэрээр долоодугаар сард болсон эцэг Али Хаменеигийн оршуулгын ёслолд мөн оролцоогүй. Харин Ираны эрх баригчид Можтаба Хаменеи аюулгүй газраас улс орныг удирдаж, өндөр түвшний шийдвэр гаргалтад оролцож байгаа гэж мэдээлж байна.
Наймдугаар сарын эхээр Ираны төрийн хэвлэл Можтаба Хаменеи болон Ерөнхийлөгч Масуд Пезешкиан нар долоодугаар сарын сүүлээр уулзсан гэж мэдээлсэн. Гэхдээ уулзалтын дүрс бичлэг, гэрэл зураг олон нийтэд гараагүй байна. Ийнхүү Ираны Дээд удирдагч олон сарын турш олны өмнө гараагүй нь түүний биеийн байдал болон улс орныг хэрхэн удирдаж байгаа талаар асуулт дагуулсаар байгаа юм.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.