Цэцэрлэг, сургуульд бүртгүүлэхэд түр оршин суугчаас байрны гэрчилгээ шаардахгүй

Боловсролын яамнаас хичээлийн шинэ жилийн бэлтгэл ажлын талаар мэдээлэл хийх үеэр сургууль, цэцэрлэгийн бүртгэлтэй холбоотой иргэдээс ирж буй гомдлын шийдвэрийг танилцуулсан юм. Нийслэлийн боловсролын газрын дарга Б. Амартүвшин түр оршин суух хаягтай иргэдээс хүүхдээ сургууль, цэцэрлэгт бүртгүүлэхэд нь орон сууцны өмчлөлийн гэрчилгээ буюу байрны ордер шаардахыг хатуу хориглосон болохыг албан ёсоор мэдэгдэв. 

Сургууль, цэцэрлэгүүд түр оршин суугчдаас үл хөдлөх хөрөнгийн гэрчилгээ нэхэхийг хориглосон хэдий ч эцэг эх, асран хамгаалагчид тухайн хаягтаа бодитоор амьдарч байгааг нотлох албан ёсны бусад баримт бичгийг бүрдүүлэх шаардлагатай хэвээр байна. Боловсролын газрын өгсөн мэдээллээр, нэг байрны хаяг дээр богино хугацаанд олон хүүхэд шилжүүлэн бүртгүүлж, хуурамч бичиг баримт бүрдүүлэх зөрчил цөөнгүй илэрсэн тул ийнхүү хаягийн бодит байдлыг нягтлах шаардлага үүсжээ. 

Шинэ хичээлийн жилд Улаанбаатар хотын хэмжээнд нийт 653 цэцэрлэг үйл ажиллагаа явуулахад бэлэн болоод байна. Үүнээс 331 нь улсын буюу төрийн өмчийн, 322 нь хувийн хэвшлийн цэцэрлэг байна. Ерөнхий боловсролын сургуулиудын хувьд нийт 340 сургууль сурагчдаа хүлээн авахаар бэлтгэлээ хангаснаас 182 нь төрийн өмчийн, 158 нь хувийн өмчийн сургууль байгааг албаныхан мэдээллээ.

Сургууль, цэцэрлэгийн бүртгэлийг 2022 оноос эхлэн төрийн үйлчилгээний нэгдсэн цахим системээр дамжуулан зохион байгуулж байгаа бөгөөд энэ жилийн бүртгэл амжилттай үргэлжилж байна. Одоогийн байдлаар цахим системээр дамжуулан 100,481 хүүхэд цэцэрлэгт хамрагдах хүсэлтээ баталгаажуулсан бол нэгдүгээр ангид элсэх 36,016 хүүхэд бүртгүүлжээ.