София Ли дэлхийн тусгаар тогтносон бүх улсаар аялсан хамгийн залуу хүн болоход ойрхон байна
Аляска гаралтай, өдгөө 20 настай София Ли дэлхийн бүх тусгаар улсаар аялсан хамгийн залуу хүн болж Гиннесийн дэлхийн дээд амжилтыг шинэчлэхэд тун ойртоод байна.
Өдгөө Нэгдсэн Үндэстний Байгууллагаас хүлээн зөвшөөрсөн 195 орны 186-д нь хөл тавиад буй тэрбээр өмнөх амжилтын эзэн Лекси Алфордын үзүүлэлтийг давахын тулд сүүлчийн цөөн улсыг зорихоор зэхэж байна.
София Ли 13 настай байхдаа буюу 2019 онд эцэг эхийнхээ албан ёсны зөвшөөрлийн дагуу анхны бие даасан олон улсын нислэгээ хийж, Коста-Рика улсыг зорьж байжээ. Энэхүү аялал түүнд дэлхий ертөнцийг судлах хүсэл тэмүүллийг төрүүлж, улмаар 14 насандаа дэлхийн бүх тусгаар улсаар зочилсон хамгийн залуу аялагч болох том зорилт тавьсан түүхтэй. Тэрбээр 16 насандаа ахлах сургуулиа хугацаанаас нь өмнө төгсөж, кино урлагийн чиглэлээр их сургуульд суралцах төлөвлөгөөгөө хойшлуулан, иогийн багшийн сертификат авснаар аялалдаа бүрэн төвлөрчээ.
Гиннесийн дэлхийн дээд амжилтыг 2019 онд 21 нас 177 хоногтойдоо дэлхийн бүх улсаар аялж дуусгасан Лекси Алфорд эзэмшдэг байна. София 17 насандаа 50 гаруй орноор аялаад байсан боловч дэлхийн дээд амжилтыг баталгаажуулах хатуу дүрэм, шалгуурын дагуу тухайн улсуудад очсон баримт нотолгоогоо бүрдүүлэхийн тулд хэд хэдэн оронд дахин давтан очих шаардлага тулгарч байжээ.
Урт хугацааны аяллын явцад улс төрийн ээдрээтэй нөхцөл байдалтай Ливи, Туркменистан, Иран болон зэвсэгт хамгаалалттайгаар зорчсон Сомали зэрэг аюул эрсдэл өндөртэй орнуудаар аялсан байна. Түүнчлэн Бүгд Найрамдах Ардчилсан Конго Улсаар дайран өнгөрөхдөө хүнд өвдөж байв. Санхүүжилтийн хувьд эхэн үедээ цагийн ажил, сайн дурын тусламж, иогийн хичээл заах зэргээр төсвөө бүрдүүлж, нэг оронд дунджаар 100 орчим ам.доллар зарцуулдаг байсан бол цахим хуудасных нь дагагчдын тоо өссөнөөр брэндийн ивээн тэтгэлэг болон хамтын ажиллагааны орлогоор сүүлийн шатны өндөр өртөгтэй зардлуудаа шийдвэрлэх боломж бүрджээ.
Аяллынхаа философийн тухайд тэрбээр паспортондоо тамга даруулах төдийгөөр хязгаарлагдахгүй, орон нутгийн соёлд уусах, уламжлалт хоол хүнсийг нь идэх, нутгийн иргэдтэй бодит харилцаа тогтоохыг эрхэмлэдэг тухайгаа хуваалцсан байдаг. Түүний маршрутад одоогоор визний хураамж өндөр, ложистикийн болон аюулгүй байдлын хүндрэлтэй Мали, Чад, Венесуэл зэрэг цөөн орон үлдээд байгаа бөгөөд эдгээр аяллаа амжилттай дуусгаснаар гаргийн хамгийн залуу бүх улсаар аялсан дээд амжилтын шинэ эзэн болоход ойрхон байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.