Зөөврийн саванд шатахуун олгохыг хориглосон шийдвэрийг цуцаллаа
Аж үйлдвэр, эрдэс баялгийн яамнаас саванд шатахуун олгохыг хориглосон шийдвэрийг албан ёсоор цуцалж, улсын хэмжээнд зориулалтын саванд түлш хэвийн олгож эхлэхээр болсныг мэдэгдлээ. Тус яамны Төрийн нарийн бичгийн дарга Б.Дашпүрэв наймдугаар сарын 27-ны өдөр хийсэн хэвлэлийн хурлын үеэр энэхүү шийдвэрийг танилцуулсан бөгөөд энэ нь нийслэл болон орон нутгийн бүх шатахуун түгээх станцуудад нэгэн зэрэг хэрэгжиж эхэлж байна. Шийдвэрийг шатахуун импортлогч аж ахуйн нэгжүүд болон түгээх станцын операторуудад албан ёсоор хүргүүлжээ.
Аж үйлдвэр, эрдэс баялгийн сайд Г.Дамдиням Шатахууны хангамжийн шуурхай ажлын хэсгийн хурлыг удирдаж, АИ-92 автобензинийг саваар олгохгүй байх түр хязгаарлалтыг бүрмөсөн цуцлах үүрэг өгсөн байна. Уг хязгаарлалт нь анх зөвхөн нийслэл хотын хэмжээнд үйлчлэхээр төлөвлөгдөж, наймдугаар сарын 15-ны өдөр дуусгавар болох хуваарьтай байжээ. Гэвч орон нутгийн зарим шатахуун түгээх станцууд саванд шатахуун олгохоос үргэлжлүүлэн татгалзсаар байсан нь ургац хураалт, хадлан бэлтгэлийн чухал үед хөдөөгийн оршин суугчдад хүндрэл учруулсан тул яамнаас ийнхүү хатуу анхааруулга өгч, зориулалтын аюулгүй саванд бензин, дизель түлшийг шуурхай олгохыг даалгасан байна.
Шатахууны нийлүүлэлтийн хувьд наймдугаар сард нийт 74,780 тонн АИ-92 автобензин захиалснаас наймдугаар сарын 27-ны байдлаар 51,000 тонныг импортоор оруулаад байна. Үлдсэн 23,000 тонн шатахууныг энэ сардаа багтаан татан авахаар төлөвлөжээ. Түүнчлэн тус сард захиалсан 158,650 тонн дизель түлшнээс 130,000 тонныг амжилттай хүлээн авч, дотоодын хэрэгцээг хангахаар ажиллаж байна.
Сүүлийн 24 цагийн хугацаанд 3,360 орчим тонн шатахуун бүхий 56 вагон цистерн хүлээн авчээ. Үүнээс 780 тонн шатахууныг нийслэлийн 88 шатахуун түгээх станцад, харин 500 тонныг орон нутгийн 45 станцад хуваарилан хүргэсэн байна. Үүнээс гадна 2,580 тонн түлш тээвэрлэсэн 48 вагон цистерн өртөөнүүд дээр ирж, буулгах ажиллагаа хийгдэж байгаа бөгөөд үргэлжлүүлэн түгээлтэд гаргахаар бэлтгэж байна.
Хангамжийн тогтвортой байдлыг хангах үүднээс салбарын сайд Г.Дамдиням уул уурхай болон хөдөө аж ахуйн томоохон үйлдвэрлэгчдэд дизель түлшний гурван сарын нөөцийг бүрдүүлж, тогтвортой хадгалахыг үүрэг болголоо. Энэхүү арга хэмжээ нь намрын их ажлын үеэр түлшний хомсдол үүсэхээс сэргийлэх бөгөөд цаашид хэрэглэгчдийг шатахуунаар тасралтгүй, найдвартай хангахад чухал нөлөө үзүүлэх юм.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.