Ерөнхий сайд асан Л.Оюун-Эрдэнэ 150 тэрбум ам.долларын усны төслийн тусгай элчээр томилогджээ

Шведийн Стокхольм хотноо зохион байгуулагдсан Дэлхийн усны долоо хоногийн үеэр ерөнхий сайд асан Лувсаннамсрайн Оюун-Эрдэнийг Дэлхийн усны түншлэл (GWP) байгууллагын глобал элч бөгөөд Ази, Номхон далайн ус болон уур амьсгалын тэсвэртэй байдлын хөрөнгө оруулалтын зөвлөлийн өндөр түвшний тусгай элчээр томилсныг албан ёсоор зарлажээ. Энэхүү нэр хүндтэй томилгоо нь 2026 оны наймдугаар сарын 23-наас 27-ны өдрүүдэд болсон "Усны хөрөнгө оруулалт, эдийн засгийн дипломат ажиллагааны элч нарын олон улсын анхдугаар форум"-ын үеэр шийдвэрлэгдсэн бөгөөд тэрбээр уг албыг 2030 оныг дуустал хашихаар болсон байна.

Шинээр томилогдсон тусгай элчийн гол зорилго нь Ази, Номхон далайн бүс нутагт уур амьсгалын өөрчлөлтөд тэсвэртэй байдлыг хангах, усны нөөцийг хамгаалах төслүүдэд зориулж 2030 он гэхэд 150-иас доошгүй тэрбум ам.долларын хөрөнгө оруулалтыг татах, дайчлахад чиглэж байна. Азийн хөгжлийн банкны (АХБ) нарийвчилсан тооцоолол, судалгаанд үндэслэсэн энэхүү амбицтай зорилтыг хэрэгжүүлэх санаачилгыг Дэлхийн усны түншлэл болон Өндөр түвшний зөвлөл хамтран 2026 оны арванхоёрдугаар сард Абу Даби хотноо болох НҮБ-ын Усны бага хурлын үеэр дэлхий нийтэд албан ёсоор танилцуулахаар төлөвлөжээ.

Л. Оюун-Эрдэнэ шинэ албан тушаалд томилогдсоныхоо дараа хэлсэн үгэндээ усны асуудал нь дэлхий нийтийн аюулгүй байдалтай шууд холбоотойг онцлоод, "Ус бол манай гаргийн амьдралын судас, дэлхийн энх тайван, аюулгүй байдлын үндэс юм. Газар нутгаа хамгаалахын тулд усны эх үүсвэр, нөөцөө хамгаалах ёстой" хэмээн мэдэгдэв. Тэрбээр өмнө нь засгийн газрын тэргүүнээр ажиллаж байхдаа уул уурхайн салбарт усны тогтвортой хэрэглээг нэвтрүүлэх, 2030 он гэхэд нийт газар нутгийн 30 хувийг улсын тусгай хамгаалалтад авах зорилт дэвшүүлж, уур амьсгалын өөрчлөлтөд өртөж буй нүүдлийн мал аж ахуй эрхлэгчдийг дэмжих чиглэлээр бодит ажлуудыг санаачлан хэрэгжүүлж байсан турхлагатай юм.

Дэлхийн усны түншлэлийн тэргүүн Пабло Бересиартуа энэхүү томилгоог сайшаан хүлээн авч, Л. Оюун-Эрдэнийг усны хомсдолыг шийдвэрлэх чиглэлээр бодит туршлага хуримтлуулсан, олон улсад итгэл хүлээсэн зүтгэлтэн хэмээн тодорхойлсон байна. Түүнчлэн түүний улс төрийн нөлөө болон манлайлал нь Ази, Номхон далайн уур амьсгалын өөрчлөлтөд өртөмтгий бүс нутгуудад шаардлагатай 150 тэрбум ам.долларын хөрөнгө оруулалтыг татах, өндөр түвшний улс төрийн удирдагчдыг энэхүү үйлсэд нэгтгэхэд шийдвэрлэх үүрэг гүйцэтгэнэ гэдэгт итгэлтэй байгаагаа илэрхийлжээ.

Энэхүү томилгоо нь уур амьсгалын өөрчлөлт эрчимжиж буй энэ үед бүс нутгийн усны аюулгүй байдлыг хангах, хөрөнгө оруулалтыг нэмэгдүүлэхэд чухал түлхэц болох юм. Ирэх жилүүдэд хэрэгжих тус санаачилга нь уур амьсгалын тэсвэртэй байдлыг бэхжүүлэх замаар олон сая хүний ундны усны хангамж, амьжиргааг хамгаалахад чиглэсэн дэлхийн хэмжээний томоохон алхам болж байна.