Лейпцигийн халдлага Францад анхааруулга болов
Германы Лейпциг/Халле нисэх буудалд Украины цэргийн тээврийн онгоц руу тэсрэх бодис бүхий дроноор халдахыг завдсан хэрэгтэй холбоотойгоор Францын Дотоод аюулгүй байдлын ерөнхий газрын (DGSI) дарга Селин Бертон Францад ийм төрлийн халдлага гарах эрсдэл нэмэгдэж байгааг анхаарууллаа.
Наймдугаар сарын 4-нд НАТО болон Украины ачаа тээвэрт ашигладаг Ан-124 онгоцны ойролцоо тэсрэх бодис бүхий дрон унасан байна. Дрон дэлбэрээгүй бөгөөд мөрдөн шалгах ажиллагааны үеэр цэргийн зориулалттай тэсрэх бодис илэрчээ.
Мөн өөр нэг дрон ачааны онгоцтой мөргөлдөж, бага хэмжээний хохирол учруулсан байна. Үүний дараа наймдугаар сарын 14-нд нисэх буудлын ойролцоогоос дахин нэг дрон болон 50 орчим грамм тэсрэх бодис олджээ. Халдлагын ард хэн байгааг Германы эрх баригчид одоогоор тогтоогоогүй байна.
Селин Бертон наймдугаар сарын 26-нд болсон бизнесийн форумын үеэр Лейпцигт болсон хэрэг нь Францад ч ийм эрсдэл үүсэж болзошгүйг харуулж байна гэж мэдэгджээ. Тэрээр эрчим хүч, холбоо, батлан хамгаалах зэрэг чухал салбарууд дроны халдлага болон бусад хорлон сүйтгэх ажиллагааны бай болж болзошгүйг анхааруулсан байна.
Францын зэвсэгт хүчний генерал Фабьен Мандон мөн хямд үнэтэй дроныг олноор ашиглах довтолгоонд Европын орнууд хангалттай бэлтгэгдээгүй байгааг хэлжээ. Түүний мэдээлснээр Украин, Оросын дайны үед шөнө бүр олон зуун дрон ашиглагдаж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.