АНУ Хятадын засгийн газрын дэмжлэгтэй кибер халдлагын томоохон сүлжээг хаалаа
АНУ-ын Хууль зүйн яам болон Холбооны мөрдөх товчоо Хятадын засгийн газрын дэмжлэгтэй хакерын бүлэглэлийн ашиглаж байсан дэд бүтцийг шүүхийн шийдвэрийн дагуу хураан авч, үйл ажиллагааг нь таслан зогсоосноо мэдээллээ.
Мөрдөн шалгах ажиллагааны явцад тус бүлэглэл АНУ-ын төрийн байгууллага, чухал дэд бүтэц болон хувийн хэвшлийн байгууллагуудын сүлжээнд нэвтэрч, мэдээлэл цуглуулдаг байсан нь тогтоогджээ. Тэдний бай болсон байгууллагуудын дунд АНУ-ын Хууль зүйн яам, NASA, Холбооны нөөцийн сан, Сенат, Эрчим хүчний яамны харьяа гурван үндэсний лаборатори, Эрүүл мэнд, нийгмийн хамгааллын яам болон Үндэсний эрүүл мэндийн хүрээлэн багтсан байна.
Мөн АНУ болон Өмнөд Солонгост үйл ажиллагаа явуулдаг дөрвөн компани, аюулгүй байдлын төхөөрөмж үйлдвэрлэгч нэг компани халдлагад өртжээ. АНУ-ын эрх баригчдын мэдээлснээр уг халдлагыг "QTFY" нэртэй хакерын бүлэглэл үйлдсэн байна. Тус бүлэглэл нь БНХАУ-ын Нанжин хотод байрладаг "Nanjing Xinjiuwei Network Technology" компанитай холбоотой бөгөөд уг компанийн үйлчлүүлэгчдийн дунд Хятадын Батлан хамгаалах яам болон Ардын чөлөөлөх арми байдаг гэж шүүхийн баримтад дурджээ.
Хакерууд интернэтэд холбогдсон төхөөрөмжүүдийг илрүүлж, халдварлуулах зориулалттай "QScan", халдварласан төхөөрөмжүүдийг нэгтгэн халдлагын эх үүсвэрээ нуухад ашигладаг "QTRouter" системийг ашиглаж байжээ. Калифорни мужийн Өмнөд тойргийн шүүхийн зөвшөөрлөөр АНУ-ын хууль сахиулах байгууллагууд хакеруудын ашиглаж байсан qtproxy.xyz, qt-proxy.org, qt-team.com гэсэн гурван домэйныг хураан авч, үйл ажиллагааг нь зогсоосон байна.
АНУ-ын Ерөнхий прокурор Тодд Бланш улсын дэмжлэгтэй хакерын бүлэглэлүүдийг таслан зогсоож, хариуцлага тооцно гэж мэдэгдсэн бол ХМТ-ны дарга Кэш Пател уг ажиллагааг Хятадын кибер заналхийллийн эсрэг хийсэн томоохон арга хэмжээ гэж тодорхойлжээ. Шүүхийн баримтад дурдсанаар тус бүлэглэл 2018 оноос хойш идэвхтэй ажиллаж байгаа бөгөөд 2019 онд NASA-гийн сүлжээнд нэвтрэхийг оролдож байжээ.
Харин 2024 оны есдүгээр сард АНУ-ын Үндэсний эрүүл мэндийн хүрээлэн болон эрчим хүчний лабораториудын сүлжээнд нэвтэрсэн байна. БНХАУ-ын тал дээрх мэдээллийг эрс няцаажээ. Вашингтон дахь Хятадын Элчин сайдын яамны төлөөлөгч АНУ үндэсний аюулгүй байдлын ойлголтыг хэтрүүлэн ашиглаж, Хятадыг гүтгэн харлуулахын зэрэгцээ тус улсын компаниудад ялгаварлан гадуурхсан хязгаарлалт тогтоож байна гэж мэдэгдсэн байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.