Шархадсан цэргүүдийг үхлийн бүсээс аварсан Украины захирагч улсынхаа дээд цолыг хүртэв
Украины Харьков мужийн минажүүлсэн аюултай бүсээс хүнд шархадсан хоёр цэргийг амь өрсөн аварсан дайралтын ротын захирагч, бага дэслэгч Владислав Польскийд тус улсын хамгийн дээд шагнал болох "Украины Баатар" цолыг гардууллаа.
Өмнө нь байгалийн ухааны багш байсан, өдгөө "Багш" хочит 29 настай тэрбээр 2026 оны наймдугаар сарын 15-ны өдөр болсон тулааны үеэр шархадсан цэргүүдийг нүүлгэн шилжүүлэх хуурай замын нисгэгчгүй тэрэг сүйрсний дараа өөрийн амь насыг үл хайрлан хоёр цэргийн амийг аварчээ.
Харьков мужийн хойд хэсэгт орших Оросын тагнуулын болон цохилтын дронуудын байнгын хяналтад байдаг, минажүүлсэн бүсэд уг үйл явдал болжээ. Өөр батальоны хоёр дайрагч цэрэг Оросын байрлалыг амжилттай эзэлсэн боловч буцах замдаа Оросын "Молния" (Аянга) тэсрэх дронд өртөж, хөлөндөө хүнд ил хугарал авсан байна. Тэднийг аврахаар Украины зэвсэгт хүчин алсын удирдлагатай, дөрвөн дугуйт хуурай замын тээврийн хэрэгслийг (UGV) илгээсэн боловч Оросын дрон тэргийг цохиж, "Starlink" терминалыг нь устгаснаар холбоо тасарч, төхөөрөмж хөдөлгөөнгүй болжээ. Шархадсан цэргүүдийн нэг нь суваг руу мөлхөж нуугдсан бол нөгөө нь ил задгай газарт гацсан тэрэгнээс салж чадалгүй үлдсэн байна.
Тухайн нөхцөл байдлыг 15 орчим километрийн цаанаас удирдах байранд дэлгэцээр харж байсан "CODE 9.2" тусгай дайралтын 475 дугаар хорооны ротын захирагч Владислав Польский дээд тушаалын шийдвэрийг хүлээлгүйгээр, хамгаалалтын дуулга, хуягт хантааз болон дроны долгион сарниулагч цахим хэрэгсэлгүйгээр саарал өнгийн иргэний пикап автомашиныг хөлөглөн тус бүс рүү гарсан байна. Тэрбээр шатсан техникүүд болон минажүүлсэн талбай дундуур гарамгай жолоодож, гацсан тэрэгний дэргэд очин, шархадсан хоёр цэргийг машиныхаа тэвш рүү суулган, Оросын дронууд ойртохоос өмнө амжилттай авран гарчээ.
Улмаар наймдугаар сарын 24-ний даваа гаргийн Тусгаар тогтнолын өдрийн баярын хурлын үеэр Ерөнхийлөгч Зеленський Киев хотноо түүнд улсынхаа цэргийн хамгийн дээд одонг биечлэн гардуулсан байна. Ерөнхийлөгч шагнал гардуулах үеэрээ "Хүмүүсээ хамгаалах ёстой. Владислав чамд баярлалаа!" хэмээн онцлон тэмдэглэжээ.
Эх сурвалж:
• ua.news
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.