ШТС-уудаас авсан шатахууны эхний дээжийн шинжилгээгээр стандарт зөрчөөгүй нь тогтоогджээ
Нийслэлийн хэмжээнд үйл ажиллагаа явуулж буй шатахуун түгээх станцуудаас авсан шатахууны дээжид хийсэн лабораторийн шинжилгээний эхний дүн гарчээ.
Одоогоор “Петровис”, “Тэс Петролиум”, “Шунхлай”, “Сан Петролиум” компанийн ШТС-уудаас авсан АИ92, Евро-92 болон АИ95 шатахууны найман дээжид октаны тоо болон хүхрийн агууламжийг тодорхойлсон байна.
Шинжилгээний дүнгээр дээрх шатахуунуудын октаны тоо болон хүхрийн агууламж нь Монгол Улсад мөрдөгдөж буй MNS 0216:2011 стандартын шаардлагыг хангасан байна.
Тухайлбал, Евро стандартын шатахууны хүхрийн агууламж 10 ppm-ээс ихгүй байх ёстой бол энгийн шатахууны хувьд 500 ppm-ээс ихгүй байх шаардлагатай. Харин шинжилгээнд хамрагдсан Евро-92 шатахууны хүхрийн хэмжээ 9.0-9.2 ppm, энгийн-92 шатахууных 187.7-195 ppm-ийн үзүүлэлттэй гарчээ. Нэг дээжид нийт 13 төрлийн үзүүлэлтээр шинжилгээ хийдэг бөгөөд одоогоор үлдсэн 11 үзүүлэлтийн шинжилгээг үргэлжлүүлэн хийж байна.
Лаборатори шинжилгээг бүрэн дуусгаж, нэгдсэн тайланг маргааш өглөө салбарын хяналтын газарт хүргүүлэхээр ажиллаж байгаа бөгөөд үүний дараа шатахууны чанарын талаар илүү дэлгэрэнгүй мэдээллийг олон нийтэд хүргэх юм.
Сурталчилгаа
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.