Вашо мужид онц байдал зарлаж, 42 мянган хүнийг нүүлгэн шилжүүлжээ
АНУ-ын Невада мужийн Вашо тойрогт гарсан ой хээрийн түймрийн улмаас онц байдал зарлаж, аюултай бүсээс 42 мянга гаруй оршин суугчийг яаралтай нүүлгэн шилжүүлээд байна.
2026 оны наймдугаар сарын 22-ны бямба гаргийн өдөр Рино хотын баруун хойд хэсэгт орших Сомерсетт дүүргийн Хок Мидоу болон Колд Крик замуудын орчимд дэгдсэн түймэр нь хуурай цаг агаар, хүчтэй салхины улмаас хурдтай тархаж, орон нутгийн оршин суугчдын амь нас, эд хөрөнгөд аюул учруулж эхэлжээ.
Түймрийн тархалтыг зогсоох, орон нутгийн аврах албаныханд дэмжлэг үзүүлэх зорилгоор Невада мужийн Амбан захирагч Жо Ломбардо Вашо тойрогт онц байдал зарласан байна. Энэхүү шийдвэрийн хүрээнд мужийн Үндэсний гвардийг дайчлан, гал түймэртэй тэмцэх агаарын ажиллагаанд зориулж хоёр нисдэг тэрэг, нүүлгэн шилжүүлсэн бүс нутгийн аюулгүй байдлыг хангах ажилд 60 цэргийг илгээжээ. Одоогийн байдлаар гал унтраах, авран хамгаалах ажилд 800-1000 орчим мэргэжлийн гал сөнөөгч, онцгой байдлын ажилтан ажиллаж байна.
Цаг агаарын таагүй нөхцөл байдлын улмаас түймрийн хамрах хүрээ богино хугацаанд тэлж, наймдугаар сарын 23-ны байдлаар 13 мянга гаруй акр (ойролцоогоор 5200 гаруй гектар) талбайг хамарсан боловч галын тархалтыг хяналтад авч чадаагүй байна. Түймрийн улмаас Рино хотын баруун хойд хэсэгт хэд хэдэн орон сууц, барилга байгууламж сүйрч, гурван иргэн, гурван гал сөнөөгч нийт зургаан хүн бэртэж гэмтжээ. Мөн Вашо тойргийн 10 мянга орчим өрх, аж ахуйн нэгж цахилгаангүй болж, тээврийн хөдөлгөөнийг хязгаарлах зорилгоор АНУ-ын 395 дугаар чиглэлийн хурдны замын зарим хэсгийг хаасан байна.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.